香港電影金像獎提名名單 呢啲提名幾離奇

第39屆香港電影金像獎今日宣佈咗提名名單。受武漢肺炎疫情影響，大大小小嘅藝術活動包括Art Basel藝術展及香港藝術節都決定停辦，金像獎亦唔例外，頒獎禮將會延遲至5月中之外，仲決定改由錄播形式舉行。其實用咩形或舉行對香港觀眾嚟講無咩大分別，因為頒獎禮現場觀眾以業內人士、電影公司代表為主，無咩街客。

再者，近年頒獎禮無咩睇頭，有時份司儀稿仲懶好笑、笑埋自己人一份。業界自己都唔多上心，更何況一般觀眾？加上，睇返提名名單，大部份戲都未正式上映，甚至內地片多過香港電影，觀眾連戲都無睇過，完全無從評價賽果合理與否，個獎做俾電影人睇多過觀眾睇，頂多獲獎後海報多個「榮獲香港電影金像獎最佳xxx」做賣點！

不過睇返今年個提名，都有啲值得開心嘅。除咗年年有出現見慣見熟嘅名字，今年叫多返啲新名字，肯定年青電影工作者嘅努力。好似提名「最佳導演」，除咗葉偉信（《葉問 4 完結篇》）資歷較深同作品較多之外，其他4位都算得上係新一輩導演︰首次獲提名最佳導演嘅分別有曾執導《十年》嘅周冠威（《幻愛》）、楊曜愷（5項金馬提名《叔．叔》）及麥曦茵（《花椒之味》），而曾國祥則繼2017年《七月與安生》後再憑《少年的你》獲提名。

「最佳男主角」除咗港片常客古天樂及郭富城外，仲有樂隊朱凌凌成員朱柏康憑《金都》入圍及以《叔．叔》老年同志角色入圍嘅太保。有啲可惜係太保戲中拍檔，上年憑《翠絲》技驚四座嘅袁富華則未獲提名，而易烊千璽則以《少年的你》一洗TF BOYS清純偶像形象，分別入圍最佳男主角及最佳新演員。

我比較好奇何謂新演員 — 易烊千璽雖然年輕，不過早出道嘅佢已經拍過好多電視劇，電影亦客串過至少2部，仲算新演員？而憑《叔．叔》入圍嘅區嘉雯為資深舞台劇演員，有超過30年演戲經驗，不過未拍過電影，咁又算唔算新人？可以肯定係其餘3位入圍者劉俊謙（《幻愛》）、鄂靖文（《新喜劇之王》）及李宛妲（《葉問4完結篇》）就真係無咩演藝經驗，絕對係影壇新人！

「最佳女主角」方面，鄭秀文憑《花椒之味》及《聖荷西謀殺案》分別佔咗2個席位，會係大啲機會得獎，家係自己「界」自己票，重演2002年以三套戲入選（《瘦身男女》、《同居蜜友》、《鍾無艷》）結果空手而回嘅結果？憑《七月與安生》攞過影后嘅周冬雨再次以曾國祥作品入圍，有望再次復製成功方程式？鄧麗欣以《金都》貼地港女角色入圍；近年主攻台灣、唔講以為係台灣女星嘅蔡思韵則憑《幻愛》首次獲得提名。

「最佳電影」算正路，分別為《少年的你》（12項提名）、《花椒之味》（11項提名）及《麥路人》（10項提名）、《叔．叔》（9項提名），比較有趣嘅係名單上仲有《新喜劇之王》。通常入得最佳電影都會有導演、劇本、攝影等技術獎項提名，面面俱圓先叫最佳電影，不過《新》只係入圍最佳男配角、最佳新演員共3項，無任何技術獎項提名，但又有份角逐最佳電影，呢下都幾離奇！

第39屆香港電影金像獎部份提名名單：

最佳電影：

《少年的你》

《叔‧叔》

《花椒之味》

《麥路人》

《新喜劇之王》

最佳導演：

曾國祥《少年的你》

周冠威《幻愛》

楊曜愷《叔‧叔》

麥曦茵《花椒之味》

葉偉信《葉問 4 完結篇》

最佳男主角：

易烊千璽《少年的你》

古天樂《犯罪現場》

太保《叔‧叔》

朱栢康《金都》

郭富城《麥路人》

最佳女主角：

周冬雨《少年的你》

蔡思韵《幻愛》、

鄭秀文《花椒之味》

鄧麗欣《金都》

鄭秀文《聖荷西謀殺案》

最佳男配角：

姜皓文《犯罪現場》

盧鎮業《叔‧叔》

張達明《麥路人》

萬梓良《麥路人》

張琪《新喜劇之王》

最佳女配角：

區嘉雯《叔‧叔》

賴雅妍《花椒之味》

鮑起靜《金都》

劉雅瑟《麥路人》

蔡卓妍《聖荷西謀殺案》

最佳新演員：

易烊千璽《少年的你》

劉俊謙《幻愛》

區嘉雯《叔‧叔》

鄂靖文《新喜劇之王》

李宛妲《葉問4完結篇》

新晉導演：

文偉鴻《使徒行者 2 諜影行動》

黃綺琳《金都》

黃慶勳《麥路人》

梁國斌《獅子山上》

卓翔《戲棚》