全港8大鰻魚飯推介!$72大大份鰻魚飯、人氣港式蜜汁燒鰻魚

啖啖肉又香甜嘅鰻魚係唔少人至愛,今期介紹8間口碑唔錯嘅鰻魚飯畀大家,有傳統日式原條鰻魚飯、有街坊抵食店,亦有罕見啲嘅港式燒鰻魚,睇吓邊間啱口味!

梳乎厘鰻魚飯 Kome Kushi

鰻魚飯就見得多,梳乎厘鰻魚飯你又見過未?呢間位於赤柱嘅創意料理就將日本關西常見嘅滑蛋鰻魚配搭變成雞蛋梳乎厘加燒鰻魚,梳乎厘空氣感重蛋味香濃,燒鰻魚肉質嫩滑,啱晒相機食先呀。

圖: wnganc
圖: wnganc

家庭式日式小店 三河屋•尾張屋

一間口碑唔錯嘅家庭式日式小店,鰻魚飯係佢哋嘅招牌菜式之一,鰻魚燒得好香口,而且厚肉肥美,魚油味都幾突出,醬汁份量亦啱啱好。不過飯就有少少偏軟身,如果可以改善下就仲好呀,不過以$88呢個價錢嚟講性價比已經好高。

圖: 車媽媽
圖: 車媽媽

日本連鎖鰻魚專門店 名代宇奈備長炭燒鰻魚飯專門店

平價嘅日本連鎖鰻魚專門店,雖然主打平民化,但選材同製作方法一啲都唔馬虎。以備長炭燒鰻魚飯馳名,無論係鰻魚、飯、醬油定係炭都相當講究,鰻魚相當肥美,燒到有微微炭香。雙層鰻魚丼同鰻魚飯三食都係好受歡迎嘅菜單之一。

圖: eatwithoutguilt
圖: eatwithoutguilt

蒲燒原條鰻魚飯 秘

主打吉列牛嘅人氣日本烤肉店,不過佢嘅鰻魚飯都一樣咁出色同咁受歡迎㗎。蒲燒原條鰻魚飯鰻魚超大條,鰻魚彈牙而且好juicy,配埋餐廳自家秘製飯素,送飯食真係一流呀。

圖: MGani
圖: MGani

$72大大份鰻魚飯 立哥麵家

元朗一間深受街坊歡迎嘅港、日式小店,唔少人都係為個鰻魚飯去食㗎,因為只係$72就有大大份鰻魚飯!用價廉物美去形容呢碗鰻魚飯就最啱,鰻魚肥美,入口即溶,配埋滑蛋同醬汁一齊食,口感同味道都好豐富呀。

圖: cczia
圖: cczia

活燒蒲燒鰻魚飯 金鶴拉麵

雖然呢間店係拉麵店呀,但一樣都唔少客人去食鰻魚飯㗎~每份鰻魚飯都用上1/4條鰻魚,足足有半斤咁多。而且每日新鮮劏活鰻,再逐條起骨,鰻魚燒至焦香,一入油亦感受到魚油香氣,厚肉肥美,難怪咁受歡迎。

圖: carykof
圖: carykof

鰻魚朴葉飯 德美壽司

鰻魚愛好者必試,呢間嘅鰻魚飯先烤過再放上飯蒸,口感好滑嫩,完全唔腥。而且面頭鋪上朴葉加添咗成碗飯嘅香氣,醬汁味道恰到好處亦無蓋過魚味,珍珠米亦都好軟熟,粒粒分明,值得一試呀!

圖: Picky Couple
圖: Picky Couple

蜜汁燒鰻魚 源興美食

睇得多日式鰻魚,知唔知原來港式方法整鰻魚都一樣咁正!呢道蜜汁燒鰻魚用上大白鱔嘅靚腩位,油脂好豐富。而且師傅已經將鰻魚去骨,一入口外脆內軟,充滿魚香同淡淡蜜香,就咁食定送飯都一樣咁好味。

圖: cwsmag
圖: cwsmag
我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能