香港5大天婦羅推介 中環天婦羅omakase、人氣軟殼蟹丼

天婦羅係其中一樣日本名菜，傳統嘅日式天婦羅係用海產或蔬菜裹上厚重嘅小麥粉同木薯粉漿油炸。不過要做出一份出色嘅天婦羅並唔簡單，坊間好多天婦羅都有唔香脆、過油、外皮同餡料分開等問題。今期就介紹5間香港嘅天婦羅專門店畀大家，有高級嘅天婦羅omakase，亦有親民版嘅天婦羅丼飯，豐儉由人呀。

天婦羅新貴 Tempura Jiro

一位難求嘅新開天婦羅專門店，主打天婦羅omakase，午市$880晚市就$1880，所有海鮮同蔬菜都係最新鮮，而且單睇天婦羅質素已經食得出師傅功架喇。如車海老，會一隻薄漿另一隻用厚漿呈上，炸漿火候控制得唔錯。海苔魚子都好出色，海苔炸得啱啱好，超香脆，咬落去滿滿魚子嘅鹹香於口中爆發，口感同味道都好豐富。

東京天婦羅匠人主理 廣尾內津

東京天婦羅匠人內津貴久主理嘅，抱住將食材真味發揮極致嘅信念，呈現最佳嘅天婦羅料理畀食客。一樣係主打omakase，毛蟹天婦羅係必食item，又脆又鮮又甜多重享受。和牛天婦羅都好有特色，和牛軟嫩又juicy，做到外脆內軟嘅效果。紫蘇葉海膽天婦羅炸漿好薄脆，海膽creamy，一入口充滿鮮味。

日本天丼金賞獎 天吉屋

連續五年榮獲日本丼聯盟天丼金賞獎嘅人氣天丼、天婦羅專門店。秘製粉漿以多種麵粉混合而成，油溫都調較得啱啱好，炸出香脆而唔油膩嘅天婦羅。醬汁亦都係自家秘製，味道鹹鹹甜甜，越食越開胃。招牌天吉丼材料包括黑虎蝦、海紅鯛、魷魚及溫泉蛋等，為咗增強鮮蝦嘅口感，特意將兩隻鮮蝦合拼炸成天婦羅，好彈牙。香港限定軟殼蟹丼啖啖都係鮮甜蟹肉，送飯一流。米飯都大有來頭㗎，使用北海道七星米，每粒米都大而晶瑩剔透。

天婦羅名店副線 天海家草庵

中環天婦羅名店天海開設嘅副線品牌，價錢就親民得多，雖然定價平，但餐廳依然堅持選用新鮮食材。而且炸漿配方、用油、醬汁同米飯都同本店一樣，炸漿由天海日本師傅傳授，選用兩種炸粉混合，加入冰水，特別薄而且香脆鬆化。山葵天丼係基本入門版，有海老、雞肉、竹輪及兩款野菜，適合每款都想試下嘅朋友。軟殼蟹天婦羅丼飯加入原隻軟殼蟹天婦羅，香脆仲食得出蟹膏，味道香濃，仲有原隻流心蛋撈飯食～

30cm長星鰻天婦羅 金子半之助

來自日本嘅過江龍，主打江戶前天丼，用咗江戶時代嘅丼飯醬汁秘方再配搭優質食材，連續5屆榮獲日本全國天丼金賞！必試有江戶前天丼，有齊穴子、鳳尾蝦、帆立貝魷魚天婦羅餅、溫泉蛋、海苔，同莢豌豆，穴子即係星鰻，有差唔多30cm咁長，口感彈牙有魚香，加上柚子解膩，食起上嚟無咁heavy！

文: Yanica