馬國明攞正牌孖高海寧拍床戲

視帝馬國明與高海寧昨日宣傳新劇，男方笑言特別申請跟高海寧拍親熱戲，更自爆有「床戲」，屆時會與女友湯洛雯一齊睇，不擔心被對方扭耳仔！

馬國明、高海寧（高Ling）、黎諾懿、朱敏瀚與簡淑兒等，昨日到將軍澳電視城宣傳下周播出的新劇《C9特工》。提到《唐人街》臨時抽起，改播此套兩年前拍完的劇集，馬國明說：「其實之前排過出，但唔知點解抽起，但冇諗過依家播，因為《唐》劇Budget大，通常臨近台慶月都係播Budget大嘅劇，但我亦唔係對呢套劇冇信心，劇本幾好，係我鍾意嘅小品，輕鬆得嚟又好多感人位。」

與女友一齊睇

他透露與高Ling有親熱場面：「我申請番嚟㗎！可以同女神合作，高Ling今次好大突破，要演個肥師奶。（親熱戲係點？）我哋係兩公婆，會喺床上傾偈。（淨係傾偈？）求婚都有錫，但申請唔到其他，拍嗰陣我心跳加速。」問到播映時可會不准女友湯洛雯（靚湯）收看？他笑言：「唔會。（一齊睇？）冇所謂。（唔怕畀佢扭耳仔？）唔會嘅。」至於靚湯好友高Ling亦說：「我哋可以一齊睇，靚湯好大方嘅。」

馬國明讚高Ling專業，拍第一集已弄傷頭部，但仍堅持繼續拍攝，高Ling笑言：「醫生話會自己好番，依家好啲，好似仲開咗竅。」

黎諾懿積極減磅

同場的黎諾懿透露最近肥了10公斤：「我會食晒阿仔同老婆食剩嘅嘢，同埋拍《疫境廚神》我專煮埋啲邪惡嘢食，煮前又要試食，所以真係要減番。」並自爆被老婆嫌棄：「佢睇韓劇啲男主角好弗，見到我個肚腩後，就叫我還番8舊嘢（腹肌）畀佢。」並稱近月開始戒油戒鹽減肥，務求今年內可以除衫騷肌。