馬國明要做惡爸爸 鄭嘉穎對付蠱惑「仔」 重建父威

慈父鄭嘉穎昨日宣傳台慶劇時，自爆在屋企被兒子蝦，希望能重新建立父威；至於馬國明則稱將來若做爸爸，一定會是嚴父。

鄭嘉穎、馬國明、何依婷、張寶兒等昨日在將軍澳電視城出席台慶劇《星空下的仁醫》宣傳，席間公布首集七天跨平台總收視錄得23.2點，內地播放平台亦獲9.1分高評分。

嘉穎呻在家被大仔蝦，現時屋企大仔惡晒，豈不是變成小霸王？他笑說：「唔好咁講，我驚佢將來會睇到，扭計會氹吓佢，郁手郁腳就要阻止。」他希望能重新建立父威：「佢依家唔驚我，仲有啲蠱惑，好識做戲添，老婆話佢似足我，依家喺屋企同佢切磋吓演技。」馬國明則指將來如果做爸爸一定會是嚴父，絕不縱容小朋友。

互相睇好奪視帝

講到陳凱琳指現時每日5點就會趕回家湊仔、追劇，嘉穎笑說：「我都係唔使開工、唔使打波就喺屋企，之前打8號風球都有叫佢（馬國明）上嚟食飯，係佢嚟唔到。」

被取笑要陪女友湯洛雯的馬國明笑說：「可唔可以唔好8號風球約呀？」講到網民睇好兩人奪視帝，他們則相當禮讓，皆稱看好對方，嘉穎笑說：「我客串㗎啫，梗係畀啲TVB實戰緊嘅。」

何依婷散發仙氣

何依婷與張寶兒皆在劇中飾演實習醫生，一個被網民讚有「仙氣」，另一個則遭老公袁偉豪有彈冇讚。何依婷笑說：「仙氣呢的演技嚟，不過，搞到我依家好大壓力，唔敢大笑驚冇儀態。」張寶兒則說：「我晚晚都捉老公捧場，但係佢都係挑剔多，有彈冇讚，叫我講對白可以慢啲清晰啲，同埋演繹唔使咁肉緊。」何依婷直言不敢看網民評價，驚自己未能承受，但會重看演出求進步。