馬國明難忘做手術:比動作戲更難

東方日報
·2 分鐘文章
馬國明指拍攝時遇上很多阻滯,幸團隊齊心,一齊跨過難關。
馬國明指拍攝時遇上很多阻滯,幸團隊齊心,一齊跨過難關。

無綫新劇《白色強人Ⅱ》於內地完成拍攝,團隊精神甚佳,眾人大表不捨。馬國明坦言今次是入行以來拍外景最難忘的一次,指拍手術戲比動作戲更難。而張曦雯拍完最後一場戲時,忍不住爆喊。

馬國明、陳豪、郭晉安、唐詩詠、胡定欣及張曦雯,剛於內地拍完《白色強人Ⅱ》,大前晚監製羅永賢率領眾人開香檳及吃煞科飯慶祝。馬國明昨日受訪,坦言這個多月的外景是入行以來最難忘一次:「一來因為疫情關係,大家一嚟到就要隔離,我哋隊Crew有40幾人,今次阻滯亦特別多,過程就好似一齊共患難,不過成個團隊精神好好,希望疫情快啲過去,以後唔使一齊過咁嘅患難。」

胡定欣有使命感

談到手術室戲,他表示比拍動作場口更難:「一啲都唔容易!我夠膽講拍手術室嘅戲比拍動作戲更需時,每一個過程、動作都唔可以錯,拍得好仔細。」至於首次着醫生袍的胡定欣坦言很有使命感:「我第一次拍手術戲,好彩現場有專業醫生指導,我哋都問咗好多問題,真係唔容易。(有冇手震?)咁又冇。」

唐詩詠皮膚敏感

張曦雯表示大家由第一輯到現在,感情很深厚,故拍完最後一場戲時忍不住喊:「尤其係詩詠同安哥哥(郭晉安),安哥哥真係教咗我好多嘢,睇住我成長。」並指內地粉絲到深圳探班,買了不少美食及飲品給劇組品嘗。而唐詩詠自爆到內地後水土不服,不停屙兼皮膚敏感:「好嚴重,成塊面紅晒,起晒粒粒,隔離完啲朋友寄護膚品嚟打救我,真係要監製幫手,做後期時幫我執靚佢。 」

此外,陳豪早前於當地過生日,日前百忙抽空見粉絲,於當地出席商演搵真銀,大會更特製一個有其「全家福」的蛋糕送給他。

監製羅永賢(左四)率領眾人開香檳。
監製羅永賢(左四)率領眾人開香檳。
張曦雯(左起)讚胡定欣與唐詩詠好戲,獲益良多。
張曦雯(左起)讚胡定欣與唐詩詠好戲,獲益良多。
張曦雯多謝粉絲特意探班送食物。
張曦雯多謝粉絲特意探班送食物。
陳豪出席商演,獲贈「全家福」蛋糕。
陳豪出席商演,獲贈「全家福」蛋糕。