馬德鐘忍笑接招過足癮

·2 分鐘文章
馬德鐘讚角色充滿挑戰,內心掙扎戲有得發揮。
馬德鐘讚角色充滿挑戰,內心掙扎戲有得發揮。

馬德鐘在新劇飾演亦正亦邪的律師,坦言複雜內心戲及背長對白都不難,最難反而是要忍笑接歐陽震華的爆肚!問到兒子可會正式入行?他持開放態度,但讚囝囝遺傳了其演藝天分!

視帝馬德鐘夥拍另一視帝歐陽震華(Bobby)演出熱播劇《伙記辦大事》,飾演律師戴政君的馬德鐘坦言角色有很多內心掙扎位:「角色其實都幾脆弱,只係夾硬裝到好強勢保護自己同家人,後尾為愛嘅人做咗好多嘢。」他大讚這種不外露的角色很好玩:「好耐冇演過類似咁嘅角色,發揮上幾過癮。」他又難忘一鏡到底拍長10分鐘的法庭戲:「同賴慰玲拍,我要求大家情緒好啲,不如雙機一齊拍,好過癮、好享受,過程真係好似打緊場官司。」

他又透露與Bobby兩雄相遇有很多鬥智鬥力的火花:「同Bobby有幾多正面交鋒嘅戲,佢係警察,而我就係熟悉法律嘅人,大家點樣喺灰色地帶游走對付對方。」對於相隔逾20年再與Bobby合作,他大感開心:「好親切,之前大家碰面都會食飯。同埋有咁開心嘅對手,現場為大家帶嚟好多歡樂,但我嘅角色唔可以咁歡樂,所以係個矛盾位。(埋位前盡量唔講笑?)佢有時拍都會爆肚,我要接佢爆肚嘢,又要配合角色,用個好正經嘅手法。(忍笑好難?)有啲難,但幾好玩。」

有幫兒子排戲

至於講到與現年22歲的兒子馬在驤曾父子檔拍廣告,兒子又有客串拍劇,問到可期待同場對戲?馬德鐘說:「冇刻意諗,佢拍劇,我都有幫佢排戲,叫做暗地裏有對手戲。」兒子現仍在澳洲讀機械工程,問到畢業後可會讓他入行?他說:「畀佢自己選擇,佢依家享受讀書過程。(如果佢入行會支持?)係。(擔心佢做星二代大壓力?)如果好介意人哋講你,你會好辛苦,但佢個人本質幾放得開,所以ok。」他又讚囝囝面對鏡頭自然:「比我初入行好。(遺傳咗你嘅演藝天分?)都有啲。」

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能