馮盈盈㷫合合：我要坐佢機！

馮盈盈向來語出驚人，不過前晚竟被飛機師李傑志（Brian）反客為主，用有味笑話搞到她「㷫合合」，對方一時話Handle到濕滑跑道，一時又指要出力先貼服，難怪盈盈點名要坐他的飛機。

馮盈盈、戴祖儀、林穎彤與何依婷等前晚為《衝上雲霄大選》網上直播擔任嘉賓，4位靚女與多位機師、空姐及空少傾偈，大談「航空秘聞」。直播開始前，盈盈表示之前見到參賽者穿制服的一面，笑言已「加分」，而全晚被指Dry爆的祖儀坦言沒有從事航空業的朋友，見到靚仔時「個心卜卜跳」！節目期間，盈盈不時拉低衫，笑言因見到多位靚仔搞到㷫合合，而機師麥大力以磁性聲線作航班廣播，單憑聲線已令靚女們𠵱嘩鬼叫，問到拍拖次數，他情聖上身：「我唔數㗎！」

揸陸煥恆過手癮

前組合Square成員Brian亦不輸蝕，實行以有味笑話搶Fo，主持陸浩明叫他扮約祖儀食飯，女方姣問：「去邊度食先？係咪有得入Lounge㗎？」他即說：「我哋可以邊食飯邊搵機場同跑道囉！唔緊要，濕滑嘅跑道我Handle到！每次遇到濕滑嘅跑道我哋都要大大力咁壓落去，咁先至安全同貼服。」對話3級令全場尖叫，盈盈更笑到冇晒儀態，不時用手撥風降溫，更笑說：「我想坐Brian飛機呀！」之後又走到空少陸煥恆身邊捏其手臂，更自爆認識對方女友。

另外，Brian事前受訪，對於有指麥大力是最大勁敵，他說：「佢最靚仔，男女通殺。」而機艙服務員史穎喬則被踢爆以詩詞歌賦談戀愛，即被陸浩明取笑明白為何男士會與她分手。