馮盈盈後悔Hurt人 戒色做「熟」女

·3 分鐘文章
出道5年來是非纏身,盈盈承認過去不懂拿捏分寸,令人感到難受。
出道5年來是非纏身,盈盈承認過去不懂拿捏分寸,令人感到難受。

「新聞女王」馮盈盈拍劇、綜藝「起雙飛」,但為了提升演技,即使忙爆仍修讀心理課程。視演藝為終身事業的她,短期內不打算再拍拖,為求進步不惜「戒色」犧牲戀愛,婚姻更是遙遙無期!由於對自己要求很高,壓力爆煲的她連發夢都諗住拍檔陸浩明,連自己都嚇親!

下月10日便踏入27歲的馮盈盈,出道時性格率真,經過5年時間洗禮,煉成金剛不壞之身。以為連串是非會對她造成心理烙印,她向Fans大派定心丸:「真係冇唔開心,反而感激大家留意我。要保持呢個心態,同自己講唔好諗埋一邊,正所謂No news is bad news(沒有新聞即是壞新聞),只係早排屋企人打畀我,問我要唔要搬返去一齊住,先知原來佢哋好擔心我,所以就提醒自己做好啲囉!」

她無意效法麥明詩及朱千雪另謀發展,堅定視演藝工作為終身事業,更與無綫「加簽」10年約,未來尚有很長的一段日子要走,催化她變得成熟:「以前成日Natural high,講嘢可能過咗分寸,雖然唔係刻意令其他人有Hard feelings,但都畀人唔經大腦嘅感覺。依家人大咗經歷多咗,唔想再好似以前咁Green,令觀眾覺得我冇進步。」

驚覺升呢「阿姐」級

盈盈有感《#後生仔傾吓偈》人才輩出,躋身一眾KOL中,驚覺已變身「師姐級」,她說:「之前為《開心大綜藝》綵排,我同6號(陸浩明)喺旁邊畀意見,同佢哋睇Playback檢討。年紀上可能大家差唔多,但我已經好似前輩,好似火速成長咗咁。」

最近盈盈的演出可謂遍布「每一個角落」,由電視劇到綜藝節目,幾乎日日見到她。談到事業,她不無野心,直言希望「代表作」早日出現:「無論係劇集定節目,都想觀眾一提起,就讚我嗰次做得唔錯。」近日《逆天奇案》正在熱播,盈盈的「超港女」演出成為網民熱話,她亦自知角色乞人憎:「不過換個角度講,畀人鬧即係做得成功啦!(劇中單戀陳展鵬,現實中有冇試過?)真係冇喎!但假設性咁講,我諗我都會好似角色咁,唔會周旋於三角關係,獨立女生自己都可以過得好好,而且人生除咗感情,仲有好多重要事。」

做番學生哥呻難

與醫生舊愛甩拖,緋聞男友鄭衍峰又冇下文,短期內未有打算再墮愛河的她,謝絕任何異性埋身,實行戒色!她將日常生活「逼爆」,每日僅休息數小時:「我報讀咗個關於心理嘅課程,知唔知咩叫Deadline fighter?我6月要交十幾份Paper趕畢業,但依家只係做咗幾份咋!覺得自己青春不再,只係大學畢業咗幾年,依家做番學生感覺已經好難。我又唔係打算考獲專業資格嘅,畢到業都算對自己有交代喇!點知我壓力大到不堪,有晚發夢同6號一齊考Science(科學),佢話佢識晒,我當堂成個紮醒,你話幾恐怖呢!」

盈盈有感青春不再,與無綫加簽長約,視演藝為終身事業。
盈盈有感青春不再,與無綫加簽長約,視演藝為終身事業。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能