馮盈盈畀足面 唱好麥明詩「男友」

藝人馮盈盈現身《衝上雲霄大選》宣傳，席間激讚麥明詩的緋聞男友盛勁為，直認是畀面姊妹！而盛勁為自爆獲麥明詩教路要操弗身形，當晚會唱歌冧評判。

馮盈盈、鄭衍峰、何依婷與應屆港姐冠軍謝嘉怡等昨日出席《衝上雲霄大選》外景探班，跟15位參賽者見面。盈盈表示睇好麥明詩的緋聞男友盛勁為（Keith），問到是否因為麥明詩的關係？她笑說：「絕對係！而且佢之前上過《#後生仔傾吓偈》，無論對答或者對鏡頭都好有經驗。」問到好姊妹可有交代過要好好關照Keith？盈盈說：「咁又冇，我好公正！當晚有才藝表演，睇吓邊個畀到驚喜我。」

至於鄭衍峰入行前曾做過空少，問到盈盈會否覺得從事過航空業的人特別吸引？她即指着對方：「都係！佢哋喺待人接物上受過訓練，對人好有禮貌同舒服。」她又自爆要扮演麻煩乘客去刁難參賽者，笑言與現實相反：「我上到機就由頭瞓到尾，又會幫襯買免稅品。」鄭衍峰即讚她是最受歡迎的乘客，盈盈非常受落！

何依婷擇偶唔貪靚仔

備受睇好的Keith自言沒有壓力，只當參加派對，問到身邊朋友有何反應？他說：「佢哋不停截圖笑我！（麥明詩呢？）佢冇笑，有畀意見，話我可以Keep Fit啲。」自嘲無肌可騷，比賽當晚會表演唱歌：「已經係我最好嘅才藝！（平時唱歌冧女？）唔需要。（靠咩冧女？）傾吓偈，唔會無啦啦唱歌。」另一參賽者陸煥恆則是兼職健身教練，預告會騷肌。

同場的何依婷讚參賽者高質素，問到會否想有空少或機長做男友？她笑說：「本身冇諗，見到佢哋咁靚仔之後就覺得唔好，會冇安全感。男友唔使太靚仔，係睇性格唔係睇樣。」謝嘉怡自爆鍾情制服男。