馮盈盈食得健康 有「素」得計

東方日報
·1 分鐘文章
馮盈盈不只注重飲食,亦會多做運動保持健康。
馮盈盈不只注重飲食,亦會多做運動保持健康。

藝人馮盈盈在大學時修讀食物及營養學系,故對健康飲食十分有心得,她推介大家可以食素:「明白如果平時唔係素食者,好難一下子轉食純素,我都唔係完全素食者,所以會一星期食一日素,Green Monday,同時初一、十五都會有個理由畀自己食素、唔食肉。」她教大家如果一開始想較易接受,可以食植物肉:「用大豆、米、菇嚟整,整到同免治肉冇分別,仿豬肉、仿牛肉都有,我試過用嚟整梅菜肉餅,味道、質感都好似,唔講都唔知係齋,整完出嚟仲會有汁同少少彈牙嘅感覺,又可以整獅子頭、肉醬意粉、漢堡包都得。」

她又教大家不要食太多加工食品:「為咗Keep Fit,我少食煙肉、香腸、罐頭等加工食品,會揀番啲新鮮食材,又少用人造調味料,會用番檸檬、香草、辣椒等天然調味料。我由讀書開始就唔食呢啲,因為知道加工食品加咗好多防腐劑、添加色素,長期食對身體唔好,所以最好食番天然食物,可以滿足營養又唔會有副作用。」

畢業於食物及營養學系的盈盈,對健康飲食零舍有心得。
畢業於食物及營養學系的盈盈,對健康飲食零舍有心得。