騰訊海外有4大火頭

中美關係劍拔弩張，今次到特朗普「亮劍」，騰訊立即腳軟，股價一度跌穿500。騰訊海外到底有邊幾方面有潛在可能被美國「百國聯軍」打擊？大家研究一下：

搞騰訊投資的海外公司

如果大家記得，騰訊內地業務，偶爾就會被中央打壓，一時話後生仔打機打上癮要禁，一時又話題材敏感要改甚至延遲審批，成日打亂部署，所以呢幾年騰訊都密密發展海外市場，Activision Blizzard、Ubisoft、Epic Games呢啲都有投資。

特朗普唔俾《絕地求生》呢啲遊戲上外國Apps store事少，搞騰訊有份投資嘅企業事大，如果最終迫Grinding Gear Games、Blizzard、Epic Games剝離騰訊先可以繼續經營，都幾大件事。至於騰訊全資持有嘅Riot Games等，都唔使指意再發展。

中國大使館用微信支付

唔好以為，禁微信只係唔俾人用whatsapp咁簡單。對騰訊來說，透過微信支付，喺外國賺返中國人錢先係主菜。中國人愛購物愛支付，而騰訊一直都希望微信支付擴展到其他國家。唔講唔知，其實全球20個中國大使館同領事館都係用微信支付，同阿里爭一日長短。如果微信支付真係同微信陪葬，失去嘅，其實係全球中國遊客。當然呢一刻全球停擺未見影響，到明年疫情好轉，到時騰訊便會見財化水。

會否被迫出售雲端業務

大海航行靠舵手，呢幾年騰訊轉舵後，一直視雲端業務為新增長點，目前在美國、加拿大、新加坡、印度同德國都有數據中心，管理層期望收入可以短期內倍數增長。但如果特朗普真係出招，又迫美國科技買下業務，騰訊呢方面嘅努力隨時打回原形。

無得再玩初創投資

最後就係非遊戲類投資，例如全球各大初創公司都有騰訊身影。騰訊曾通過旗下公司以17.78億美元在公開市場收購Tesla股票，佔股5%，仲有Snapchat 母公司都係經典例子。假如美國再玩絕啲，牽連呢類收入比重對騰訊其實都唔細嘅「被動投資」，未來騰訊應該都只能買「恆馳」，又或者中國盟友的創投了，但北韓、老撾、伊朗會有乜強大獨角獸，真係要中國先知。

上述四大項，唔係中國人妄自菲薄，而係要知己知彼，百戰不殆。面對現實，有時都係重要，騰訊海外個火頭絕對唔細﹗唔係大摩咁講，2%收入無影響。只係騰訊「大得不能倒」，國家隊點都會出手，肯定唔會價殘過地底泥咁解。

所以華為任正非同一部份中國企業家，點都覺得中美關係唔好無彎轉就係咁解，要有交流同貿易，中國先會「又贏」。

===============

精選資訊網站「中環街市」 臉書粉絲頁