《驅魔麵館》結局收視破紀錄 官方宣佈9月開拍續集

《驅魔麵館》劇照
《驅魔麵館》劇照

由人氣漫畫改編嘅Netflix熱播韓劇《驅魔麵館》於本月24日終於播出大結局!雖然由13集開始換咗個編劇,令到一班劇迷好擔心結局會爛尾,不過好彩收視率都有10.999%,再次刷新開播以來最高紀錄!

大結局中講述四位驅魔人合力打被「四級惡鬼」池清臣附身嘅申市長,雖然中間趙炳圭被惡鬼打斷腳,睇到一班劇迷咬牙切齒,不過佢喺關鍵時刻能力再度進化,最後用念力打贏惡鬼,將佢丟入地獄泥漿池中,被其他惡鬼淹沒。而申市長被消除惡鬼記憶醒返之後亦被警方逮捕獲判無期徒刑,非常大快人心!

結局另一亮點當然就係趙炳圭同父母團聚嘅一幕啦!大結局中一家人成功喺「融」重逢,可惜父母已經認唔出18歲嘅趙炳圭,好彩經過一番轉折最後都認得返仔仔,享受片刻嘅溫馨家庭樂,睇到一班觀眾眼濕濕。而後來趙炳圭更加主動向父母表示金世正係佢女友,唔知導演係咪特登留條伏線呢?去到最後,呢班驅魔人繼續喺南韓打擊惡鬼附身嘅犯罪分子,仲由紅色運動裝換上超型嘅黑色西裝,再加上趙炳圭話會繼續戰鬥,直到惡鬼消失為止。

劇集咁成功,OCN電視台已經表示《驅魔麵館》將會製作第二季,今年9月開鏡,明年上半年播出。不過究竟係咪沿用四位主角趙炳圭、劉俊相、金世正同廉惠蘭就未能確定。而導演方面亦引起爭議,因為有好多劇迷投訴自從13集換走咗原本編劇呂芝娜之後改由導演本人編寫嘅劇情一夜間變得荒謬無理,幸好後來搵咗《純情漫畫》嘅編劇金新春編寫14至16集先至拯救返啲收視。所以一班觀眾已經紛紛留言希望換導演同埋用返元祖編劇。究竟第二季會製作成點?大家真係要拭目以待喇!

《驅魔麵館》海報
《驅魔麵館》海報

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!