雅虎香港新聞 【驚蟄打小人】新手入門謬誤逐個拆解 指名道姓會折福？
星期三就係驚蟄，發展至今可能無人知來由，只係知呢個係打小人嘅時間！每年驚蟄於銅鑼灣鵝頸橋都會有排長龍打小人嘅情況出現，鞋打落地上嘅聲音此起彼落。不過有關打小人嘅流程、注意事項，可以參考呢度；但如果閣下一直未試過去打小人，又心思思想去，就要先睇以下最多人誤解嘅謬誤，以免去到發現同自己所想不同，白走一趟。
打小人並非惡毒詛咒
成日聽「打你個小人頭，打到你有氣無碇透」之類，好似講到要置人於死地一樣，非常狠毒；其實真正打小人只會講「打過小人大展鴻圖」、「打過小人升官發財」等，多數只係求福求財，並非損人利己！
決不指名道姓
一直以嚟打小人只為驅走身邊「小人」，泛指身邊一啲事非或者厄運，並不會指名道姓打某某人，而負責打小人嘅婆婆亦一般唔會接受指名道姓嘅要求，因為會折福架！不過發展至今好多人已經唔理，直接寫上小人姓名，婆婆都會照打，鬼叫搵食艱難咩！
驚蟄正日加價兼排兩個鐘
其實平日打小人婆婆都會於鵝頸橋開檔，平日一樣可以打小人，收費為$50 ；不過正日打當然效果比較好，一般會加價至$60 ，而且由於人多，成幾百人排隊，放工時間呢啲熱門鐘數隨時要排2個幾鐘，大家自己預下喇。
九龍都有得打小人
大家都知銅鑼灣鵝頸橋長期擺檔打小人，其實九龍都有得打，就係油麻地廟街、榕樹頭天后廟對開。另外西營盤嘅福德祠其實都有得打，不過當然都係以鵝頸橋最大規模啦！
打小人勿張揚同區返工咪去
打小人屬於偏門活動，其實係不宜張揚，所以打小人千萬唔好貪得意影相放上IG、FG；另外都唔好於自己工作區域到打喇，畀人撞見一樣唔好！
相關文章：
