高難度針灸狂NG 何廣沛亂咁拮 蔡思貝捱痛委屈

蔡思貝承認與余德丞相約睇舞台劇,仲唔止一次添!
蔡思貝承認與余德丞相約睇舞台劇,仲唔止一次添!

藝人何廣沛、蔡思貝日前為劇集拍外景,廣沛透露之前拍攝為思貝針灸的場面,但多次NG累對方捱痛,思貝稱每次針灸都會感到委屈想有人氹。

蔡思貝與何廣沛日前拍攝無綫劇集《你好,我的大夫》,廣沛自爆之前拍攝為思貝針灸的戲份,因落針角度錯誤而多次NG,大感內疚:「我喺顧問指導下拍攝,事前亦有練習,因為係打側拮落手指,所以有難度,雖然思貝好敬業唔怕痛,但真係好抱歉要佢捱痛,拍完全日都覺得唔開心,我會之後補償畀佢。」他稱每次拍攝針灸戲份都有顧問在旁指導,若要在危險的穴位施針會由專業人士代勞:「有場戲我幫吳偉豪針灸,我克服咗個恐懼,吳偉豪都夠膽畀我針,但顧問話太危險唔可以。」

「想有人氹番!」

思貝叫廣沛毋須內疚,反而歸咎於自己骨巉巉:「我喺劇入面都有幫人針灸,我知道落針要快狠準,如果唔夠快對方就會痛,所以我要撳住自己唔好驚同緊張。(你好有呢方面天分?)因為我平時都會睇中醫,係我嘅親身體驗,我都慣咗畀人針,但都會覺得怕,每次畀人針完都會覺得好委屈,因為已經唔舒服仲要捱痛,會好想有人氹番。」

另外,提到近日思貝被拍到跟緋聞男友余德丞結伴看舞台劇疑拍拖,她說:「唔係拍拖,講咗十幾年,佢雖然唔係同公司,但唔會影響友情,睇舞台劇係我哋共同興趣,都約過幾次,有時仲會有賴慰玲或其他朋友一齊睇。」她又指當日並非為掩人耳目而頭耷耷:「如果唔想畀人見到我就戴帽啦!只係咁啱望住個地下。(你好細心為佢整理斜孭袋條繩同按摩?)冇,但我唔記得當時係做緊咩。」並斷言兩人不會擦出愛火花。

何廣沛講到拍攝針灸場面狂NG,大表內疚。
何廣沛講到拍攝針灸場面狂NG,大表內疚。