魏駿傑離婚獨力湊女疑患抑鬱 推戲被斥無情無義 感情一切隨緣

魏駿傑

53歲魏駿傑喺2008年同細19歲嘅女友張利華結婚,2010年育有囡囡Jessica,可惜佢哋喺2015年屢傳婚變,仲有媒體影到張利華背夫偷搭外藉男士去嘉年華同埋喺的士激吻,及後魏駿傑於去年坦承同張利華離婚,並指同前妻嘅感情一早出現裂痕,將會獨力照顧女兒同埋以佢為優先。日前,佢出席有份參與嘅舞台劇《老公你好悶》記者會,張之珏導演就大爆魏駿傑嗰陣因為廿幾年冇演舞台劇,擔心演技「生銹」連累大家而想推戲。

魏駿傑解釋係因為自己嗰排身體好唔舒服:「覺得自己可能會死,總之覺得自己成身都係病,但睇咗醫生,檢查過又冇嘢。」仲話可能係因為要一腳踢照顧囡囡,有啲患有抑鬱症,所以當初提出辭演。不過,魏駿傑又透露同張之珏導演講完之後就畀佢鬧無情無義,對方畀72小時佢考慮,最終決定收返提出辭演嘅說話,決定接戲。

提到照顧囡囡時,魏駿傑就話10歲囡囡又乖又聽話,宜家自己放學,有責任感到寧願讀書做練習都唔同阿媽出去食飯,而一向以囡囡為優先呢點從來都無變,將來搵伴侶都會先考慮囡囡感受,一切順其自然,但魏駿傑就表示宜家暫時都未想搵另一半。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!