鮮肉男偶像疑偷嘢過程曝光 賴飲醉自稱已畀錢

·2 分鐘文章
鮮肉男偶像疑偷嘢過程曝光 賴飲醉自稱已畀錢
鮮肉男偶像疑偷嘢過程曝光 賴飲醉自稱已畀錢

大陸偶像文化當道,不過近日卻醜聞百出,早前男團選秀真人騷《青春有你3》被北京廣電局更下令暫停後續錄製,一班小鮮肉忽然冇得出道,尋晚(24日)更傳出其中一位選手、曾為多套偶像劇做男主角嘅彥希涉嫌偷嘢被斷正,事件更被推到上熱搜第一位!

一間北京買手店忽然公開一段CCTV片段,配合文字解說指有一位身穿潮牌Tee嘅男偶像早幾日喺店內偷走一隻幾百蚊人民幣嘅戒指,老闆怒火中燒決定搞大件事!見片中人趁保安轉身時,將枱面上一樣物品收埋喺衫袖,繼而行出畫面,有眼利網友就認出肇事人疑似係彥希。

片段被公開後3個鐘後,彥希就喺個人社交網開Live,直認片中人係自己,不過佢就解釋當時自己喺酒吧飲完酒,之後就行咗入酒吧入面嘅買手店睇衫,不過當時舖頭冇店員,佢就以為兩間舖係相連,所以拎咗隻戒指去咗酒吧畀錢,並晒出消費單據,證冇偷嘢嘅意圖,今日(25日)凌晨佢更直接落去舖頭解釋,惟店主唔願意溝通,目前事件調查中。

有唔少粉絲就力撐彥希,指本身係富二代嘅佢唔需要偷嘢,又指CCTV片段唔完整,未有影住佢拎完戒指後到底係去畀錢定係走人,更質疑店主唔肯報警反而要公審偶像,不過亦有網友指彥希表現閃縮,又不時偷睇保安,似係身有屎。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能