鰂魚涌發現泰國小木屋? 新開東北依善泰菜 原個椰汁焗飯有驚喜

泰國菜都有分好多種,包括有泰北菜、泰東北菜、泰南菜等,各個派系都各有些少分別。最近有間自1999年就開業嘅泰國菜餐廳進駐鰂魚涌,並由泰國東北大廚坐鎮,主打嘅係正宗泰國依善系菜式。餐廳設室內外座位,裝修感覺有啲似泰國小木屋。

冬蔭公湯
冬蔭公湯

依善位於泰國東北,同其他泰國菜系一樣,都係多以香料入饌,但較一般泰國菜再酸啲同辣啲。就好似冬蔭公湯咁,製法亦與坊間有所唔同,冇落到椰奶同魚露,反而就加咗泰國傳統嘅調味料、以水煮魚同烤米粉、鹽發酵而成嘅pla ra。食落除咗蝦肉嘅鮮甜味外,亦明顯較平時食開嘅略為酸少少。

生菜包
生菜包

生菜包以豬肉碎、辣椒、羅勒、薄荷等炒製,另外食落仲多咗一陣沙沙地、脆脆地嘅口感,原來係師傅加埋炒香過嘅糯米落去,增加口感。不過呢度菜就冇想像中咁辣。

炭火串燒
炭火串燒

泰國菜點少得串燒?炭火串燒有雞肉同豬肉選擇。雞髀肉以多種調味醃製超過48個鐘,再放喺傳統炭火爐上烤製;至於豬肉串,則以椰奶醃製,再沾上泰式蜜汁燒。帶有微微炭燒香,甜味突出,咖喱味就唔算好重。

三黃雞
三黃雞

三黃雞有原隻同半隻揀,均以黃咖喱同泰式香料醃製,外皮脆脆地,肉質都仲係嫩嘅,雖然淋上魚露同辣椒醬等,但味道唔會過鹹或過辣,送飯一流。

椰汁焗飯
椰汁焗飯

而眾多菜式中,椰汁焗飯則係最值得推介嘅,以原個椰青盛載上桌,粒粒飯都索盡椰汁,口感creamy又帶甜,仲要附有絲絲椰肉,啖啖都係椰香,好有誠意。仲有大大隻虎蝦都絕對係加分位。

芒果糯米飯
芒果糯米飯

最後甜品芒果糯米飯混上糯米同紫米,入口嘅味道較為豐富,配椰子味雪糕亦可中和膩感,不過可惜美中不足嘅係啲芒果偏酸,同期待中嘅香甜有少少距離。

暹館 泰國餐廳

地址: 鰂魚涌華蘭路12A-12H號地下2-10號舖

文:Kar

相:Michael