麥玲玲20年前已經封千元利是見人就派? 吳家樂爆竟然冇份︰佢話你唔使啦
梁思浩、江美儀、吳家樂主持嘅爆料節目《娛樂好好玩》,最新一集遇著新年,於是一邊打麻雀一邊講八卦嘢,仲搵埋鄧兆尊做客席主持打埋一份。早前小紅書有人發文討論明星利是封幾多錢,思浩等人都有討論呢個話題,更開名爆圈中有2位名人出名出手闊綽,20年前派出嘅利是已經係一千蚊一封,而且人人有份無分高低。梁思浩同時俾出提示指呢2個人,一個係藝人一個係風水師傅,隨後亦開名爆後者正是麥玲玲。
雖然話玲玲師傅係見人就派,但吳家樂就話試過向對方拜年講恭喜發財後,麥玲玲竟然同佢講「你唔使啦」,令家樂記到而家。唔知係咪因為家樂被封為「50億駙馬」呢?
吳家樂亦提到有位娛圈阿姐,利是「內涵」係十蚊,但亦令到家樂學到嘢。吳家樂話初入行時收入唔多,但行規係即使未結婚都要派利是,而且佢仲要主持年初一嘅新春直播節目,錄影廠內至少要派200封。當時吳家樂覺得冇理由只係封10蚊利是,直到發現一齊主持新春直播節目嘅圈中阿姐都係派十蚊,令佢鬆一口氣,之後利是都即刻「貶值」。吳家樂仲話最重要係利是封唔好有記認,亦覺得多少都唔太介意。留意返,吳家樂講嘅係「圈中阿姐」,唔一定係「阿姐」汪明荃架。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!