黃大仙頭炷香|94歲黃夏蕙白蛇造型現身 祝願港人:努力做人、身體健康|Yahoo

夏蕙姨手持青竹蛇公仔造型亮相。
夏蕙姨手持青竹蛇公仔造型亮相。

【Yahoo 新聞報道】每年初一均有不少信眾於子時上頭炷香,祈求神明保祐,今年亦不例外。頭炷香常客黃夏蕙(夏蕙姨),今日(28日)早在下午三時到達黃大仙祠輪候上頭炷香。已屆94歲的夏蕙姨花了五小時化妝,以白蛇傳造型現身,手持纏肩青竹蛇公仔。她祝願世界和平,眾人平平安安,「蛇好叻呼風喚雨乜都得,能量係好叻,可以畀啲能量大家,身體好乜嘢都做得好!」

黃大仙祠今日晚上9時起通宵開放,供善信入祠上「頭炷香」,下午約三時已有十人輪候。至於每年均會上頭炷香的夏蕙姨亦於下午三時到場,並以白蛇傳造型上香,甫出現即吸引大批市民圍觀,有人高呼「夏蕙姨好靚呀!」有外國遊客則把握機會與夏蕙姨合照。

新年大計:開老人院

去年回流香港的夏蕙姨指,蛇年願望是「香港個個都努力做人,最緊要保護身體,最緊要健康」,新年大計則是希望在港開設老人院,「繼續做自己要做嘅嘢」。她已在新界選址,「老人好慘㗎,有啲老人兒女唔睇佢,一個人,如果開老人院就可以大家玩,幾好呀!」至於今年的白蛇傳造型,她稱「上年已經開始諗個設計」,今早花5小時裝扮至下午。

多年來風雨不改,夏蕙姨形容上頭炷香是她的心願。
多年來風雨不改,夏蕙姨形容上頭炷香是她的心願。

到黃大仙祠上頭炷香多年,黃夏蕙形容「呢啲係我嘅心願」,過往有七位朋友一同上頭炷香,「一有人唔嚟佢就上咗天喇,仲嚟嘅得返我,所以我要好好哋嚟黃大仙,都希望朋友喺極樂世界開心啲」。

夏蕙姨今日下午三時已到達黃大仙祠。
夏蕙姨今日下午三時已到達黃大仙祠。

今年排頭位輪候上頭炷香的市民,是00後的年輕面孔。22歲幼稚園老師Jonathan今日早上6時便到達黃大仙祠,「 希望保佑屋企人同埋保佑啲學生,保佑同事工作順利、身體健康」。Jonathan曾向學生解釋,上頭炷香「係尊重返香港嘅傳統習俗」,今年是首次參與香港頭炷香活動。

下午約三時,有十多名信眾在黃大仙祠門外排隊。
下午約三時,有十多名信眾在黃大仙祠門外排隊。

Jonathan稱早上6時已到達,帶備露營椅排隊,「今朝好凍,出咗太陽就好好多」。他前兩日亦有到場向祠方查詢排隊位置等事宜,有朋友為他帶上食物等補給。他過往多在馬來西亞過節,今年除了為自己、家人及學生許願外,亦會為香港祈福。家住赤柱的他指疫後「經濟真係比較差,舖頭又開始執笠,餐廳又好似做唔住,作為香港人都好心痛」,希望香港在蛇年經濟好轉,「更加少瘟疫病源、開開心心」。

「00後」Jonathan今年首次參與上頭炷香活動。
「00後」Jonathan今年首次參與上頭炷香活動。

排隊人士輪流用膳:個個都識嘅

排第三、年屆60的陳女士中午12時許到達,已上頭炷香15、16年。她指排隊者有不少熟悉的臉孔,會輪流出外用膳,「個個都識嘅唔會攞咗你個位,全部都係兄弟姊妹嚟」。

陳女士希望來年港人身體健康,「唔好再有疫情」。
陳女士希望來年港人身體健康,「唔好再有疫情」。

任職護士的她希望來年港人身體健康,「總之合家平安健康,社會經濟好啲唔好咁差」,她亦希望:「唔好再有疫情,健康先搵到食,唔健康有錢都無用」。

每年農曆大年初一均有大批善信到黃大仙祠上頭炷香。
每年農曆大年初一均有大批善信到黃大仙祠上頭炷香。