【黃鴻升猝逝】入行後3段情 現任女友發文︰我只想要你

台灣藝人黃鴻升(小鬼)尋日喺家中猝逝,終年36歲。小鬼入行18年,與初戀女友楊丞琳仍保持好友關係,獲得網友稱羨,甚至形容「有一種友誼叫黃鴻升楊丞琳」。

初戀女友楊丞琳 分手後感情如同家人

黃鴻升同楊丞琳(Rainie)當年就讀嘅華岡藝校,出過唔少藝人偶像,計有大小S、林志穎、吳佩慈等。小鬼同Rainie 15歲就認識,16歲拍拖,Rainie喺訪問提到小鬼當時係風頭躉,覺得被對方睇中好開心。之後楊丞琳選擇未畢業就入行,因為藝人身份,同小鬼拖手都要避忌。過咗2年半嘅初戀生活,Rainie 提出分手,雙方和平分開。

後來小鬼同Rainie一度避免同時出席同學聚會,但仍然彼此關心,關係昇華好比家人,亦都樂意大方談及對方。近年佢地都開始有所成就,都會互相撐場支持,2018年小鬼為Rainie 演唱會擔任嘉賓,而年初小鬼的畫展Rainie 都有低調捧場,更加喺IG發文盛讚。

小鬼死訊傳出後,Rainie相當悲痛並取消工作。晚上佢喺社交媒體發文哀悼「失去你 是可惜的 不捨的 但我們沒有留下一絲遺憾」。

女團成員傳緋聞3年

2016年小鬼被爆同女團「天氣女孩」成員妞妞(趙靜儀)交往,多次影到女方出入小鬼所住大廈。小鬼有公開稱讚妞妞好可愛,係佢鍾意嘅類型,直到前年年底妞妞被指趁小鬼出國期間偷嗒富二代,「鬼妞戀」無疾而終。而妞妞得知小鬼過身之後,透過經理人回應說「非常難過」。

暗交現任女友1年半 低調交往

早幾個月台灣傳媒影到小鬼有新歡,對象係當地職業棒球隊啦啦隊成員、有「啦啦隊界林志玲」嘅峮峮(吳函峮)。峮峮憑住清純外表同火辣身材,曾經登上日本雜誌封面。今年6月峮峮被影到出入小鬼寓所,而小鬼都將私人facebook上嘅感情狀態改為「穩定交往中」。

尋晚峮峮喺IG細訴同小鬼嘅感情點滴,透露二人交往一年半,小鬼認為低調處理二人關係對雙方都好,並且抱歉於小鬼過身後公開感情「破壞了我們的約定 謝謝你一直這麼保護我寵我」。原來小鬼喺出事前曾經同峮峮提出唔結婚,因為「這樣如果未來我怎麼了妳就可以不用負責任 妳可以是一張白紙的嫁給別人」,不捨嘅峮峮悲痛寫道「可是黃鴻升 我只想要你⋯」。