黃Viu訂閱人數揮低Netflix 成為東南亞第二大串流媒體服務商

ViuTV旗下男團MIRROR人氣爆燈，勢不可擋！早前母公司電訊盈科 （008）公佈上半年業績，ViuTV嘅相關業務收入亦比上年上半年增加近一倍，虧損大幅收窄至4,400萬元，報告指ViuTV廣告發展蓬勃，及指明MIRROR能吸引廣告客戶。除咗ViuTV收入激增之外，黃Viu（OTT平台）喺東南亞嘅發展亦大有斬獲，近日成功揮低Netflix，成為東南亞地區第二大串流媒體服務商，僅次於Disney+。

黃Viu（OTT平台）係一個免費煲劇平台，主打日、韓、台、中劇集及動畫，甚至係一啲大熱嘅韓劇都可以觀看，更標榜八小時內以原音當地字幕上載。如果觀眾想收睇畫質較高，及係電視播放嘅話，就要登記及付款成為升級會員。

近日研究公司Media Partners Asia公佈資料，指截至今年6月30日，Viu已經成為東南亞地區第二大的串流服務平台，訂閱用戶人數達520萬，Netflix就有480萬，而Disney+就有600萬。雖然Viu嘅訂閱用戶人數比Netflix多，不過觀看時間就仍然同Netflix有一大段距離。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！