黎美言怒轟前隊友冇品博宣傳 斷言HotCha永不重組

·2 分鐘文章
黎美言怒轟前隊友冇品博宣傳 斷言HotCha永不重組

前女子組合Hotcha解散多時,但依然不時被翻出不和事件,早前成員Regen(張惠雅)受訪被提到同隊友嘅拗撬,佢直言同Winkie(黎美言)嗌交最多,更指:「個人比較『大剌剌』啲,未必個個人都頂得順佢嘅性格。」

此言即辣着Winkie,於社交網上載千字文還擊!其中Winkie怒轟Regen借佢宣傳新歌,鬧爆對方虛偽、無品、無團隊精神兼自私:「其實你過好自己人生,我覺得冇必要再喺你訪問度提起評論我,我哋已經係分開個體。因為對我來講,我都頂唔順你哋性格,人前人後一套,無team spirit,全為自己私心。我鍾意一齊成功而唔係分開成功,所以係我唔玩。」又暗示昔日曾被對方出賣:「一路以嚟,做咁多小動作傷害我,我覺得咁多年,手指只係識指向人,可以試吓檢討吓你自己高傲自滿嘅性格,都未必頂得你順。」

雖然今年組合踏入15周年,不過Winkie就斷言無意再重組:「無奈我一直為咗大體,唔想影響大局,隱藏自己感受多年,很痛苦。啞忍15年我現在終於落到決定,我覺得坦誠善良相處,絕對好過畀人出賣。我正式宣布呢個組合我唔會再有興趣重組,粉絲們抱歉,15周年我曾經嘗試為你們爭取過演唱會,最後我選擇自己心靈行先,你無辦法想像忍耐15年有幾受傷害。」

而Regne亦有就事件致歉,解釋原意係想指Winkie性格率直未必好多人接受到,但自己就非常樂意與對方相處,無奈因講嘢唔叻,令意思有所誤解,又直指訪問內容被斷章取義,故承諾不會再回應任何有關Hotcha的問題。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能