黑色月光｜黃翠如演繹受驚過度情緒 爆喊戲「扯蝦」哭泣聲惹網民討論

由優酷視頻和TVB聯合製作嘅台慶劇《黑色月光》引起熱話，楊茜堯日前以漸進式恥笑演繹多重情緒，被讚神演技；而暌違3年再拍劇嘅黃翠如近日一場爆喊戲亦同樣獲關注。

黃翠如於劇中飾演為楊卓娜及楊茜堯妹妹「余曦晨」，因為童年時被蔣基俊跟班鄺永源（黃鍵豐飾）侵犯及被推下山後殘疾，長大後仍未能從陰霾走出來，需要坐輪椅；當知道余滿月（楊茜堯飾）要報復蔣家，余曦晨學習行路希望參與報復行動，報復鄺永源，角色相當有發揮空間。日前（6日）播出一集，講述Barry（馬貫東飾）現身黃翠如所在嘅烘培店，令黃翠如憶起當年被對方強姦一事，嚇得目瞪口呆並從輪椅上跌下來，馬貫東即時捉住黃翠如要脅Moon姐（楊茜堯飾）要錢，黃翠如仲被馬貫東扯頭髮，雖然無對白，但係黃翠如演繹受驚過度嘅情緒，並發出「扯蝦」哭泣聲音，呢幕就惹網民討論。

有網民覺得黃翠如嘅表現未如理想，留言批評：「佢d（啲）戲咁浮誇」、「佢用個口做戲咁，長期擘大個口。睇到佢就即刻飛快唔想睇」、「王脆魚明明扮腳有事，但整蛋糕似響庇護工場咁，演技差到」、「做咁多年戲，都可以一個表情走天涯，其實都係本事」等等；不過都有網民認為黃翠如嘅喊戲有進步，睇到覺得好虐心。早前，黃翠如喺社交平台發表拍劇感受，寫道：「三年後， 再次可以擁有一個角色。 每一次都抱着最後一次演戲機會的心態，很珍惜。」亦有唔少網民留言大讚黃翠如演技有進步：「你真的演到很好很好看」、「演的很好」、「翠如妳真係將呢個角色做得好好，連我睇嘅都感動埋一份」、「妳係依個劇集，演技進步好多，好有feel」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！