「龔燁」放逐荒島 冇得留低 呂慧儀嫁雞隨雞 告別熊家

·3 分鐘文章
龔燁與熊若水結婚後就做分飛燕,相信觀眾最難接受!
龔燁與熊若水結婚後就做分飛燕,相信觀眾最難接受!

之前盛傳《愛.回家》的「龔燁」張景淳將被逐出「家」門,原來「龔太」呂慧儀亦受牽連,雙雙被「飛」!劇情交代「龔燁」被派往海外公幹,「熊若水」則要離開「熊」家,獨守空幃,相信網民期待的「小龔龔」不會在《愛》劇出現。

收視長期高企的無綫處境劇《愛.回家之開心速遞》不時大搞新意思,之前有指「龔燁」張景淳因經常遲到被高層訓話,之後會被踢出此劇,劇中老婆「熊若水」呂慧儀日前被問到此事時,故意拉開話題,更找來「阿爸」劉丹做擋箭牌,指傳聞愈傳愈誇張,並借「熊家」力撐「老公」:「新年新氣象,乜都會好!阿爸教得好好,熊家無論裏裏外外都好聽話,連女婿都教到好聽話!」

不過,空穴來風,未必無因,張景淳的確會被「放逐」,之後的劇情將講述他被派往「估你唔島」公幹,所謂嫁雞隨雞,嫁狗隨狗,老婆呂慧儀亦傳會逐出《愛.回家》!張景淳之前指自己會「暫別」,但實質是否有「歸期」仍是未知之數。本報昨日向監製林建祥問到呂慧儀會否同被放逐?他表示:「唔係,佢只係會離開熊家啫!佢嫁咗畀龔燁,做咗龔家嘅人,咁梗係要住喺佢哋屋企啦!(兩公婆分開,咁咪生唔到BB囉?)唔會住!」並透露之後劇情會落在熊家、大四喜、Rebecca、Peter與孖姐、朱凌凌及熊心如等角色身上。據知,之後農曆新年播出的集數將有3家大團圓,除了熊家及龍家外,還有另外一家,觀眾真的要拭目以待。

「小龔龔」有排未出世

對於「二妹」呂慧儀要離開熊家,「大家姐」滕麗名昨日受訪時表示:「吓,佢有走到咩?佢成日都返嚟食飯㗎喎!外嫁女最鍾意食阿爸煮嘅嘢,我都唔喺熊家住啦,咪成日返屋企黐飯食,好嘅女就好似仔一樣。同埋二妹嫁咗出去,咪好似潑咗出去嘅『水』咁,啲『水』都會返嚟!(咁你個仔金城安幾時返嚟食飯?)得閒就會捉佢返嚟㗎喇!」而呂慧儀昨日受訪時表示:「係呀!我嫁咗去龔家喇,但我都係熊家嘅女嚟!」對於本以為他們很快會生「小龔龔」,她笑說:「梗係未咁快啦!我哋仲有好多前奏,依家只係小別勝新婚。(等龔燁返嚟先造人?)梗係啦!」

巴士站應援點打卡

另外,「龔燁」張景淳前日41歲生日,獲大批粉絲支持,斥資10萬元買下巴士站燈箱及尖東一幢大廈的外牆屏幕做生日應援,並以「相信愛您定能飛」為主題,將以其名義捐錢到救助流浪貓狗的機構。張景淳親身到廣告前「打卡」,並發文感激一眾粉絲的愛意,同劇的「大小姐」林淑敏及「細龍生」鄭世豪等都有留言,至於「龔太」呂慧儀當然都有畀Like!

張景淳獲粉絲送上生日應援,當然要打卡晒命!
張景淳獲粉絲送上生日應援,當然要打卡晒命!



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能