🇬🇧英國生活每月開支方程式⚠️單身人士版本🐶

🇬🇧英國生活每月開支方程式⚠️單身人士版本🐶(按此看原文）

以下係以一隻毒毒地嘅單身人士(即係我)喺倫敦生活作藍本，couple請自行x2 (除咗屋租➡️假設你哋一齊住，業主又冇收附加費)。

1️⃣基本開支＋2️⃣其他固定開支＋3️⃣非必須固定開支＝每月生活預算

🐶人物性格設定🐶

單身人士，同人夾份租屋住，冇咩娛樂嗜好，平日好少出街，英國封城期間更加唔洗諗，交通費呀食飯呀嗰啲都慳返。日日宅喺屋企，自己煮飯。

1️⃣基本開支

A.) 租金：£775 (zone 2，我間房大約100呎，全屋三房兩廁全新裝修，月租包哂所有水電雜費連收費電視+Netflix，仲有乾衣機任用😂)

B.) 水電煤費：£0

C.) 寬頻月費：£0

D.) 市政稅：£0

E.) TV License：£0 (英國睇電視係要俾稅，每個地址一年£155左右，但我業主包埋，因為我唔睇佢都要睇)

2️⃣其他固定開支

A.) 食物: £200 (我自己煮飯，以前喺英國或歐洲返工都係帶自製三文治或飯盒做lunch👌平日幫襯開平價至中價超市，但我唔係特別慳住食先買到咁多，另外，我係一個會食£1.7一個合味道杯麵嘅廢中)

B.) 電話月費：£10 (用緊EE呢個台，6GB 4G，倫敦朋友話EE已經算收得好，我讀書年代貪平用誠哥嘅3UK，但真係可以差到喺大街都收唔到……)

C.) 交通費：£0-100 (未封城前，搭巴士多，但我冇買travelcard月票，因為我唔係日日搭地鐵同冇固定路程，其實未必抵返條數。有時夜返又會搭短途uber，一個月一兩次£10左右。)

D.) 個人護理：£30 (洗頭水、沐浴露、廁紙、M巾、洗衣液、滴露、消毒濕紙巾、酒精揉手液，簡單藥物如止痛藥、眼藥水之類，條數其實唔細。好彩口罩喺香港帶過嚟，呢邊賣得好貴)

3️⃣非必須固定開支

A.) 娛樂休閒：£6 (Apple Music，拍拖睇戲嗰啲我唔識計😂戲院正場好似~£9/早場~£4😌我通常就一條友睇Netflix，屋租包埋)

B.) 美容健身：£0 (我放棄咗自己好耐，但一般人應該會有啲開支🙄參考返，連鎖健身室月費一般£30-80；一般出街淨剪£15；我唔做facial/spa嗰啲，skin care都冇搽，所以唔太熟市價……係冬天時個人dry到爆擦流血我買咗支body cream，不過搽到夏天都嚟都未搽完🥺)

C.) 家居清潔：£0 (因為我屋主包埋全屋清潔，所以我唔洗請鐘點清潔。倫敦好多sharehouse都有請鐘點習慣，一個月嚟2次，每次2個鐘，一次大約£30-50，視乎你間屋幾大，租屋前問清楚)

D.) 社交：£0-80 (未封城前，主要係一星期一次出街食飯或去pub飲嘢，大約£20/餐，平民餐廳；封城後係£0)

4️⃣不定期開支/雜項，每月約£100

衣物：£100 (我一個喼咁飛過嚟冇帶夠衫褲，又遇著封城，上網是但買咗啲冷衫。不過一般人到埗後都會按季節慢慢添置衣物，加上香港帶過嚟嘅衫嚟到又未必啱著，請按自己買衫習慣計，英國買衫同香港差唔多價)

家居用品/小型家電：£200 (雖然我個屋主已提供所有家電，但呢筆錢真係唔好唔預，搬新地方總有啲家居嘢要買，基本如買多套床鋪被單、杯碗碟、煎pan、煮麵煲之類，用私伙廚具唔洗等人用完先有得用🤘)

不定期或突發開支真係好睇個人生活習慣，我試過因為間屋個中央暖氣系統壞咗，咁就用咗£30買咗張電暖毯，因為夜晚真係凍到個人震🥶呢啲真係估唔到，所以我每個月會預鬆少少錢，有剩就儲落下個月。

如有小朋友，計法會幾唔同，因為小朋友初初嚟到有多好多嘢買，又大得快，仲要多咗托兒費用同日後教育開支估算。不同地區同學校收費都差幾遠，以托兒嚟講，我住緊zone2，屋企附近嗰兩間半日/全日制托兒所收費就由£140-£210/week不等。

文章由Facebook專頁：好pure好true 授權刊登

Rita： 十幾年前，一個無知少女第一次旅行就去咗西伯利亞背包遊，唔經唔覺，足跡已遍車臣、格魯吉亞、科索沃、塞爾維亞、烏克蘭、摩爾多瓦、古巴、阿根廷、智利……而當年好pure好true嘅少女依家已經變成中女，繼續好pure好true咁喺英國遊歷。