【18區行山】屯門後山 彩虹欄杆直上水塘睇靚景

Yahoo 旅遊
【18區行山】屯門後山 彩虹欄杆直上水塘睇靚景
【18區行山】屯門後山 彩虹欄杆直上水塘睇靚景

今個星期18區行山,帶大家去到新界西,大家可能會話新界西咁大,可能怕好遠要行好耐,但其實喺正屯門市中心,已經可以去行山,仲有彩虹欄杆打咭,亦可以上到水塘欣賞靚景。

屯門市中心醫肚

坐車的話直接去到屯門市中心出站,當中有不少商場,包括V-City、屯門市廣場、屯門時代廣場等,可以買齊糧水,或者食個飯先再出發。出發地位於青山灣段何福堂中心,旁邊就有一條小山徑可以開始上山。

何福堂旁邊就有一條小路,開始登山。
何福堂旁邊就有一條小路,開始登山。

第一站人氣打咭點彩虹欄杆

一開始上山,沿路都係黃色欄杆非常易認,只要沿著沿途路牌「麥理浩徑」一直行就可以,直至去到一個分叉路口;右邊繼續往麥理浩徑,左邊往屯門徑,請往左邊行上屯門徑,呢度規劃得非常好,樓梯闊而整齊,有唔少老人家每日都上嚟晨運,可見係易行又舒服。大約行十分鐘左右就會見到一個指示路標往右邊寫住「藍地水塘」,不過大家千萬唔好咁心急上去,因為右上直去就係水塘,但就見唔到彩虹欄杆,所以繼續直行大路。行多5至10分鐘就會去到彩虹欄杆,七彩繽紛非常顯眼,遠遠都可以望到。

一開始直上就係沿著黃色欄杆,非常易認。
一開始直上就係沿著黃色欄杆,非常易認。
上到彩虹欄杆,200米長又有靚景睇。
上到彩虹欄杆,200米長又有靚景睇。
望出去就係全屯門靚景,十分壯觀。
望出去就係全屯門靚景,十分壯觀。

彩虹欄桿全長有200多米,可以望到整個屯門景觀,成為唔少人此行最緊要打咭點,全香港得呢度有,盡情影相之後就可以繼續出發!

登上山頂再落藍地

經過彩虹欄杆之後,行多10分鐘就會去到分岔口,亦即係「若夢園」。直行就會落返屯門,而要上藍地水塘則要另轉,直上見到一個涼亭「八方亭」。再一直上樓梯,行大約20分鐘左右就會去到最高位有另一個涼亭可以先休息一下,因為呢度並非終點;然後開始落山約30分鐘就會到達虎地燒烤場,然後再往「虎地村」方向行多5分鐘就會見到藍地水塘。可以望到水塘及堤壩景色,非常壯觀,又係一個影相位。

藍地水塘可以望埋大壩,景觀宏偉。
藍地水塘可以望埋大壩,景觀宏偉。

順住堤壩一直行,穿過小村,就會見到石礦場,就準備回程。呢度有兩條路,左邊就係往嶺南大學、兆康方向;而右邊就係藍地,兩條路都可以揀;建議大家揀藍地,因為落到去就係藍地大街,有一條好有特色嘅美食街,有唔少餐廳食肆,最啱行完山大家一齊食飯休息。食完飯只要過馬路就係藍地輕鐵,可以接駁返元朗、屯門等西鐵站,或者直接坐巴士、小巴出返葵青、荃灣都得,四通八達,好方便!


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!

你可能還想看