【2020中秋】齊撐本土小店ssss 自家製蕃薯香芋金沙月餅、馬拉直送榴槤冰皮

臨近中秋,除咗各大集團同酒店會推出月餅之外,仲有好多本土小店都有推出㗎,好值得支持!當中有啲更係自家製、純天然嘅添,啱晒注重健康嘅朋友仔。另外,不約而同地,多間小店都分別供應由馬拉直送嘅貓山王榴槤月餅,榴槤迷要mark實喇!

A Treat 潮式奶皇流心滿月

A Treat 潮式奶皇流心滿月
A Treat 潮式奶皇流心滿月

觀塘小店嘅幾款月餅都滿有特色,皇牌伯爵奶茶檸檬夾心月餅以茶葉泡出伯爵奶茶,加入鮮檸皮同果汁夾心,清新芳香,冇一般月餅咁膩。抹茶控就最掛住佢哋嘅特濃宇治抹茶流心月餅,理所當然選用佢哋一向合作開嘅@Matchæologist®HK 抹茶主義抹茶粉,味道微甘帶甜,軟糯流心。而潮式奶皇流心滿月更係今年全新推出,傳統潮式酥皮,配搭新興嘅蛋黃手工流心餡,層次豐富。重點係,全部月餅都係少甜㗎!

CookHouse 蕃薯香芋金沙月餅

CookHouse 蕃薯香芋金沙月餅
CookHouse 蕃薯香芋金沙月餅

圖﹕CookHouse Facebook官方網站

食月餅都一樣可以食得健康!呢間西餐廳推出低糖嘅蕃薯香芋金沙月餅,淡紫色嘅外皮加入紫薯粉、椰汁等。月餅餡分別有蕃薯同香芋,再加入鹹蛋黃,甜得嚟又散發住濃郁嘅鹹香。採用嘅材料都係純天然,不加防腐劑,記得要趁早食呀!

叁拾士多 陳皮紅豆月

叁拾士多 陳皮紅豆月
叁拾士多 陳皮紅豆月

圖﹕叁拾士多Facebook官方網站

呢間小店共推出兩款截然不同嘅手工製月餅——伯爵茶奶皇月、陳皮紅豆月,一款創新一款傳統。前者嘅餅皮以英國高級French Earl Grey茶葉製成,吉士饀料更加由法國訂購,香滑幼嫰。而陳皮紅豆月就以台灣相思紅豆同十年陳皮製成,不甜不膩,仲有啲回憶嘅味道!

享樂烘焙 LY Bakery 手工奶黃月餅

享樂烘焙 LY Bakery 手工奶黃月餅
享樂烘焙 LY Bakery 手工奶黃月餅

圖﹕享樂烘焙 LY BakeryFacebook官方網站

呢間本地烘焙店一向提倡純天然,唔用人造牛油、豬油等。麵包、bagel等都深受歡迎,而今年中秋更推出全新配方嘅手工奶黃月餅。外皮金黃,滿滿嘅奶黃餡,用料純天然。掛住台灣嘅朋友們,仲可以訂購埋帝王酥、台灣大甲芋頭麻糬酥同台灣烏豆沙蛋黃酥添!8 月1 號全面開賣,記得mark實日子!

花果山 頂級貓山王月餅

花果山 頂級貓山王月餅
花果山 頂級貓山王月餅

呢間人氣小店早前喺旺角結業時大家都好唔捨得,好彩最近終於喺尖沙咀重新開張啦,仲有月餅賣添!佢哋本身都係以榴槤飲品打出名堂,月餅當然都係榴槤味啦~ 新鮮到港嘅貓山王冰皮月餅,餅餡用頂級貓山王榴槤肉製成,保證足料,每一啖都有貓山王果肉,超濃郁榴槤香,食完見字都會唔捨得飲水呀!

GoodDay Cafe 馬拉直送榴槤月餅

GoodDay Cafe 馬拉直送榴槤月餅
GoodDay Cafe 馬拉直送榴槤月餅

呢間本身喺銅鑼灣開店嘅cafe,暫時結束咗營業,但新店將會落戶葵興。FANS未等到新店之前,可以訂住佢哋嘅月餅先。同樣係用馬來西亞頂級貓山王果肉製,外皮雪白,顯得入面淡黃色嘅榴槤更加吸引,味道香濃醇厚,食完仲有榴槤甜味嘅回甘添~小店今次推出嘅係迷你裝,一啖一嚿,仲過癮呀!

灃美小食 經典榴槤冰皮

灃美小食 經典榴槤冰皮
灃美小食 經典榴槤冰皮

圖﹕ King of Kings 皇上王Facebook官方網站

講到馬來西亞榴槤品牌,就一定唔少得「皇上王」啦!每年推出嘅榴槤冰皮月餅都吸引唔少榴槤迷呀!想一試經典嘅榴槤迷,可以通過呢間小店訂購。一拆包裝就聞到陣陣榴槤香,榴槤餡以90%以上榴槤果肉製造,堅係啖啖果肉,包滿足。

馬來金貓 黑色榴槤月餅

馬來金貓 黑色榴槤月餅
馬來金貓 黑色榴槤月餅

圖﹕貓山王國mumu Durian Facebook官方網站

呢款貓山王榴槤月餅,同樣係馬來西亞製造,貓山王榴槤餡相當厚實,配上薄薄嘅冰皮,口感一流呀!造型更加係別出心裁,唔單止係淡黃色,更有黑色,點估都估唔到入面係榴槤餡啦(不過咁香榴槤味,應該都估到)~