【Bookmark定】古早味隱世食店 美味台南小店推介

對於目前都未有得去旅行嘅香港人，一定係心癢到不行；奈何按照疫情走勢，今年都未必可以飛到。不過習慣做足功課先去嘅朋友，當然應該趁而家去做下資料搜集。台灣的確有唔少酒店、餐廳因為不敵疫情而結業，尤其好多新餐廳；反而擁有十幾廿年歷史嘅小店依然可以靠熟客仔而生存，成本唔高，自然可以屹立不倒。實而不華，味道經年不變，今日為大家介紹台南隱世食店，記得Bookmark定喇！

每日新鮮即製鹽水雞

鹽水雞好多時都會作為小食，未必會當正餐，呢檔名為「力湘鹽水雞」就真係連「店」都唔算，只有一架小小手推車，所有食材都放於車上，一目了然。鹽水雞唔同香港食開嗰種而係配搭各種不同材料，包括豬耳、香腸、鴨米血、豆乾等。總之鹽水雞另加3種配料都係50台幣！其中人人必選嘅配料就係自家醃製洋蔥，酸甜微辣，非常開胃；至於主角鹽水雞，每日由老闆新鮮入貨，軟嫩香滑，彈性十足，絕無隔夜，亦無冰鮮味。每日開檔就已經排長龍，賣完即止，雖然營業至晚上8點，不過好多時6點就賣晒，要食要趁早呢。

地址：台南北區成功路462號

營業時間：4PM至8PM（逢星期一休息）

50年無名古早味麵店

呢間小店絕對可以話最低調古早味食店，於1970年開業至今50年，但連店名同招牌都無，由於喺一棵榕樹之下，所以街坊就直接稱呼為「榕樹下陽春麵」。最有名係麻醬拌麵，麵條彈牙有口感，非常開胃。另外有小雲吞，同樣都係熱賣Item，一口一粒，紮實香口。除咗麵條之外，呢度嘅滷味都幾乎係人人都叫嘅美食，肉質鮮嫩，尤其係豬臉面「菊花肉」，唔係度度有得食呢！

地址：台南中西區友愛街201巷9號

營業時間：5PM至11PM

酸辣湯配小籠包 超夾！

小店開業廿多年，都只係用上「小籠包酸辣湯」作為招牌，極為低調。小籠包餡料由當天街市即買即製，皮薄就自必然一定啦，豬肉新鮮無腥味，咬落去肉汁豐富，一籠75台幣仲要有8粒！另一主打係酸辣湯，偏向酸味重，十分開胃，食嘅時候配以大量胡椒粉提味，加上湯極為足料，一碗酸辣湯加上一籠小籠包就剛好完成一餐簡單又便宜美味盛宴！

地址：台南麻豆區民權路33號

營業時間：9AM至7:30PM（逢星期三休息）