【Bookmark定】台灣親子活動推介 4大最新水上樂園

去旅行對於香港人而言可以話每年都要至少去一次嘅充電之旅，不過成年人可能係當「充電」，但同時要考慮幫小朋友「放電」喎。今次為大家推介近年最新台灣親子遊熱門地點，雖然肺炎疫情下可能今年都未必可以去，不過大家快手Bookmark定，他日全家可以再一齊去旅行時，唔怕「無貨賣」，仔女錫晒你！

最新開幕水上園區

於台北兒童新樂園，近日剛剛落成一個全新遊樂區，就係「小小水樂園」。雖然水樂園範圍唔算大，不過都可以容納100人，樂園有唔少設施包括水隧道、水桶區、套圈圈區等。本身兒童新樂園已經有20多項遊樂設施，除咗呢個小小水樂園之外，仲有摩天輪、咖啡杯、海盜船、過山車等等，另外仲有特色遊樂場場館「恐龍樂園」！

新北市兒童新樂園

地址：台北市士林區承德路五段55號

營業時間：9AM至5PM

年頭開幕水陸兩用樂園

今年年頭開幕嘅「新北市鶯歌永吉公園」係一座專門設計予小朋友玩嘅水陸公園。陸地上有攀爬區、三層滑梯、蝴蝶鞦韆、沙坑等，水方面就有三層高滑水梯、超長滑梯、互動水遊戲區、幼童玩水區等，最特別係全樂園都係免費開放，而且24小時唔關門，不過當然就不設安全監察人員，所以家長一定要自己好好睇實子女呢。

新北市鶯歌永吉公園

地址：新北市鶯歌區鶯桃路294號

營業時間：24小時

野餐兼玩水 順便鍛練身手

位於台北南港嘅玉成公園，2018、2019年分別增設若干嬉水設施，令原本已經活動豐富嘅樂園更具吸引力。玉成公園有唔少小朋友繩網設施，可以訓練小朋友身手及肌力，而全公園地面都有軟墊，非常安全。除此之外仲有超大野餐區，可以全家一齊坐低野餐，呼吸一下新鮮空氣。玉成公園附近就係南港公園，同樣係一個親子遊樂園，可以一併遊覽。

玉成公園

地址：台北市南港區中坡南路

營業時間：24小時

玩水兼學習 遊生態樂園

於新北新竹呢個樂園「塭仔底濕地公園」唔係玩咁簡單，仲係一個濕地生態園。今年新設嬉水區，係一個生態樂園連嬉水、休憩、教育功能於一身嘅親子主題區。生態區中設有人工島，提供飼養動植物棲息地，同時有一片沼澤地，當中有著完整嘅生態鏈，有唔少魚、雀仔都居於此地。雖然已經有11年歷史，不過多咗嬉水區，即時「年輕」不少！

塭仔底濕地公園

地址：新北市新莊區富貴路51號

營業時間：24小時