一場肺炎疫情，可以話改變整個世界，相信就算疫情過後，衛生都一定係大家嘅重中之中，影響嘅當然包括大家嘅旅行習慣。其中有唔少專家都提出，後疫情嘅旅行趨勢，親親大自然係必定大熱。今日就介紹定台灣3大最新露營地，而且都係主打最新嘅「豪華露營」Glamping。一齊Bookmark定，一旦疫情過後，大家想去旅行放鬆又想避開人潮，一定要留意。

花蓮觀星Camp：踏浪星辰

唔少朋友都去過花蓮，位於台東遠望太平洋，本身已經極為詩情畫意，呢個上年年尾先開幕嘅最新露營地，名為「踏浪星辰」，位於七星潭旁邊，有山有湖，極為浪漫。營地中有3款帳幕可以選擇，而且全部都富有異國風情，包括波拉島風、烏干達風、亞馬遜風，每個營可以入住3至4人。雖然帳幕只有3個，不過另外亦有3台露營車，當中有齊淋浴設備亦有冷氣。帳篷每一個都好大，當中有沙發、床、小小客廳都有。營地中有唔少公眾設施包括大草地、沙坑、滑梯、小動物園，當然仲有餐廳，大家唔想自己煮，一日三餐都有人搞掂。

踏浪星辰露營Camp

網站：按這裡

原始森林住宿：勤美學

位於苗栗嘅勤美學，為台灣最有特色露營地之一。位於苗栗香格里拉園之中，四面圍繞森林，而帳篷有兩款，一款就搭於草地之上，另一款則搭於大樹之上。勤美學另一大賣點係有工作人員會作導遊，有唔少體驗課程，包括戲劇課程、爬樹課程、美食料理課程等。入住營地標準為一泊二食，包食宿。唔少入住嘅都係一家大細，可以一齊上課程之餘，亦讓小朋友接觸大自然呢。

勤美學

網站：按這裡

山藝訓練Camp：九甲林

位於台中石岡，於山林之中呢個名為九甲林嘅營地可以話係台灣最早期營地。不過去年先翻新過，亦增設一個名為「豪華非洲狩獵帳」，建於一個特大平台之上，四面通風，就算營地不設冷氣但都一啲唔會覺得焗促，有真正露營風味。營地提供比較挑戰性活動，例如高空繩索、山藝探險、連笨豬跳都有！營地之中亦有好多公眾設施，有淋浴場地、餐廳、洗衣房等，另外除咗新區之外，亦有一早構建好嘅小木屋，可以容納一個家庭入住呢。

九甲林Camp

網站：按這裡

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！