【Jacky Ma病逝】星級髮型師熟客多 前妻爆與李麗珍三人行搞荒唐婚外情

香港星級髮型師Jacky Ma(馬桂燦）上星期四（12／3）因病逝世，終年59歲。Jacky Ma入行超過40年，生前係唔少香港藝人嘅指定髮型師，熟客包括林海峰、葛民輝、草蜢、鄭伊健等。Jacky工作態度認真，由「剪得唔好唔放手，剪得唔靚唔俾走」呢句口頭禪可見一斑。早兩年有報導提到Jacky懷疑因為胃癌而需要做切除手術，術後佢都曾經自嘲係「無胃人」，至近期病情有變，11月中舉行最後一次髮型展之後引退。

剪髮出名，但更為人記得嘅應該係太太同李麗珍發展嘅婚外情，演變成極為荒唐嘅三人行。

2004年，Jacky Ma太太Janet （李靜婷）向傳媒爆料，表示佢地兩夫婦同當時已離婚嘅李麗珍「三人同行」。Janet 話本身同李麗珍相識多年，後來搬到同一幢大廈而開始稔熟，Janet同李麗珍繼而發展親密關係。後來Jacky亦同李麗珍撻著，三個人過住同居生活。

Janet 甚至將唔少瘋狂情節紀錄成書《珍人真事》大爆內情，提到當時佢地經常開迷幻派對，甚至大被同眠，而且三個人各自嘅小朋友都目睹過呢啲場面！

而Jacky Ma喺周刊報導出街之後接受訪問，直言李麗珍係佢最愛，甚至放棄事業都肯，而且會同太太離婚之後再娶李麗珍。但係李麗珍就斷言否認同Jacky拍拖，仲話唔會搶人老公。Janet之後就話因為被人搶走老公先至作料。

Jacky Ma同Janet喺爆料事件後離婚，但亦無同李麗珍發展落去﹐之後Jacky申請破產。至於Janet就喺2010年因中風逝世。李麗珍就受呢單新聞影響淡出幕前好一陣子，後來同過舊愛潘源良復合，拍拖9年後最終分手收場。

【相關搜尋】李麗珍被指「一個月52次」