雅虎香港新聞 【Yahoo Lunch K】梁釗峰入行11年 創造專屬小宇宙讓樂迷窺探內心世界
上星期的【Yahoo Lunch K】有歌手釗峰 (梁釗峰)同咪霸吳林峰，陪大家work from home, sing from home!
釗峰最近忙於製作新專輯，同時又要馬不停蹄咁四處宣傳自己喺旺角麥花臣場館舉行嘅首個個人音樂會—《Create My Own Universe 梁釗峰音樂會2020》。今年係釗峰入行嘅第十一年，加上音樂會仲要喺Boxing Day舉辦，令本身鍾意過聖誕嘅佢更加期待同別具意義。
雖然香港嘅新冠肺炎疫情正處於第四波，但仍無損佢同團隊製作音樂會嘅決心，繼續密鑼緊鼓咁排練、籌備。佢仲為咗演唱會親手改造咗架旅行車名叫「車中泊」做宣傳𠻹。
做咁多嘢，為嘅就係親身喺現場演唱，同觀眾面對面交流。因為佢覺得只有實體音樂會先可以感受到現場嘅真情實感，亦希望喺呢個艱難嘅時刻，同觀眾分享自己嘅世界。佢解釋「Create My Own Universe」唔單止係佢專輯同音樂會嘅主題，亦都緊扣住佢嘅世界。佢認為每個人都可以擁有一個自己專屬嘅宇宙，眼前嘅好壞係取決於自己嘅諗法同點樣定義。今年，佢覺得疫情令好多人，甚至世界處於一個唔穩定、不安嘅狀態，所以大家嘅內心就更加需要練得更強大，順其自然咁去迎接每一件事。
嚟緊，釗峰嘅第二張個人專輯會喺12月22號推出。佢分享碟中首首歌都係佢嘅心頭肉，亦包含咗佢如何定義自己嘅宇宙。好似有《28天》、《日光》等歌反映佢唔同嘅價值觀，有講到人性慾望嘅《萬惡不赦》，仲有體現唔同性格嘅人物：《佚名》、《笑哈哈先生》等，每首歌都毫不保留咁分享釗峰嘅內心世界。
其中佢分享到製作新歌《笑哈哈先生》嘅故事。當佢收到《笑哈哈先生》Demo嘅時候，作詞人Wyman(黃偉文)就指出佢可以試唔同嘅嘢，揾啲未合作過嘅監製，例如：Juno(麥浚龍)，釗峰覺得呢個提議非常好，正苦惱如何「搭路」去認識對方時，剛好此曲嘅編曲Jerald(陳哲廬)正正就係Juno嘅老朋友，機緣巧合咁造就咗今次跨公司嘅合作。釗峰坦言話自己本身同Juno冇咩交情，不過彼此嘅陌生感反而令到製作更加能夠聚焦於首歌上，佢比喻今次嘅錄音就好似一個電影Casting咁，Juno會同佢分析笑哈哈先生嘅角色性格、行為動機，令佢唱嘅時候完全代入咗笑哈哈先生呢個角色。今次嘅合作，釗峰表示非常滿足而且效果都好好。
花咗咁多心機喺製作上面，釗峰希望樂迷可以好好享受呢張專輯同多多支持佢嘅音樂會，亦祝福大家身體健康。佢會以最好嘅狀態做場好嘅音樂會比大家欣賞！
睇更多YAHOO LUNCH K BACKSTAGE內容：
