【Yahoo Lunch K・Backstage】馮允謙創作靈感地 原來係屋企嘅廚房

2021年第一集嘅【Yahoo Lunch K】有歌手馮允謙(Jay)同咪霸吳林峰同大家唱歌傾傾計。

樂手Justin、馮允謙、吳林峰
樂手Justin、馮允謙、吳林峰

筆者回想第一次同今次訪問嘅主角合作,從來都知道佢係唱得之人,歌亦都好好聽,但估唔到親耳聽到佢現場演繹嘅時候,仲係會俾呢把游刃有餘,有故事嘅聲音帶嚟驚喜,忍唔住好想知道多啲,究竟係咩造就咗呢種感覺出嚟,今次終於有機會喇!

馮允謙—2020年叱咤頒獎禮男歌手銀獎、唱作人銀獎、叱咤十大第五位嘅得獎者。
馮允謙—2020年叱咤頒獎禮男歌手銀獎、唱作人銀獎、叱咤十大第五位嘅得獎者。(圖:馮允謙 FB)

講起2020頒獎禮,原來攞到叱吒男歌手銀獎係令到Jay覺得最驚喜嘅一個獎,入行差唔多十年,當然每一個獎項都好重要,但得到男歌手獎,對於Jay嚟講係一個鼓勵同提醒,要繼續做好歌手呢個身份。

2020年對於所有人嚟講都係充滿住挑戰同變化嘅一年,當然Jay都唔例外。

Jay提到,佢係一個鍾意同其他人一齊合作寫歌嘅人,喺過去一年疫情嘅影響底下少咗好多機會聚埋一齊寫歌。除咗呢個影響之外,最令Jay覺得遺憾嘅係喺過去嘅一年,冇機會返加拿大見屋企人,再加上由細照顧佢長大嘅嫲嫲最近離世,種種事情都令到Jay更加重視同家人嘅關係,而家佢同屋企人有一個 group 每一晚都要video call,起碼喺可以再面對面見到大家之前,好好珍惜同家人隔空相處嘅時間。

Jay十分重視家庭
Jay十分重視家庭(圖:馮允謙 FB)

2021年已經嚟到,問到Jay喺新一年有咩想做到,佢最希望可以開一個演唱會,圓其中一個入行以嚟最大嘅心願。相信Jay嘅fans都餓咗好耐,希望疫情快啲過去,可以現場聽到佢把靚聲。Jay仲話可以搭得返飛機嘅話,第一時間一定要去東京食嘢,好好享受一下。

講起旅行,我就問咗Jay一個問題:「去過世界各地咁多個地方,邊一個地方令到你有最多靈感去創作?」,佢嘅答案係:「加拿大屋企嘅廚房。」

原來Jay喺加拿大生活時,令佢感到最溫暖最自在去玩音樂嘅地方,就係屋企嘅廚房。問呢條問題嘅時候,我仲估Jay會答我一個好出名嘅景點,但係原來最令佢有安全感去玩音樂嘅地方,正正係自己嘅屋企。

去到訪問嘅最後,馮允謙用咗佢《A New Day》入面嘅一句歌詞做總結:

「世界如混沌了,等於展開新氣象。」

Jay 仲提醒大家,Gotta Have Faith!
Jay 仲提醒大家,Gotta Have Faith! (圖:Youtube截圖)

「除咗希望做一個好嘅歌手,仲希望自己可以成為一個好嘅仔仔,將來嘅好老公,最重要係成為一個好嘅人!」

「努力成為一個好嘅人」,大概就係呢種動力,令佢嘅音樂帶畀人一種溫暖、陽光嘅感覺。能夠成為一個好嘅歌手,除咗有好嘅聲音,有好嘅公司支持之外,仲要係一個有故事嘅人。

馮允謙,一個你絕對不能夠錯過嘅歌手。

2020年,Jay推出咗2張唱片《DETOUR》、《AWAKEN》,聽得到佢嘅努力,大家請多多支持本地歌手。
2020年,Jay推出咗2張唱片《DETOUR》、《AWAKEN》,聽得到佢嘅努力,大家請多多支持本地歌手。
2020年,Jay推出咗2張唱片《DETOUR》、《AWAKEN》,聽得到佢嘅努力,大家請多多支持本地歌手。
2020年,Jay推出咗2張唱片《DETOUR》、《AWAKEN》,聽得到佢嘅努力,大家請多多支持本地歌手。

記者:張潔瑩(咪霸)

睇更多YAHOO LUNCH K BACKSTAGE內容:

【Yahoo Lunch K】咪霸小新:叱咤觀後感—這是百花齊放的初期

【Yahoo Lunch K】《全民造星III》李昭南:鏡頭後的黃劍文