【Yahoo Lunch K】Kendy休團單飛 從創作中尋找情緒出口

上星期的【Yahoo Lunch K】有Kendy (孫曉賢)同咪霸阿Kit (張潔瑩) 一齊work from home, sing from home!

孫曉賢 Kendy  (IG圖)
孫曉賢 Kendy (IG圖)

今年成軍九年嘅Robynn & Kendy 休團,Kendy單飛做獨立歌手,再加上疫情,Kendy 坦言 2020年係佢人生中一個重要嘅章節。Kendy 離開咗舊唱片公司,獨立發展,她笑指現時嘅人生好似乾坤大挪移一樣,人生有好多轉變,當中有高高低低,雖然都有好多艱難時刻,但Kendy 相信繼續前行可以睇到更多得著更多,Kendy 相信今年呢個轉變係一個好嘅決定。

去年年尾Kendy 自己作曲、編曲、填詞,寫咗《如斯》呢首歌,喺創作呢首歌時,Kendy從歌曲中得到好多力量,佢希望呢首歌可以喺充滿未知嘅一年,帶畀其他人力量。面對今年各種動盪,Kendy每次唱呢首歌都好大感觸,好感動。完成《如斯》呢首歌之後,Kendy 無心插柳地遇見宋詞《出山相贊》嘅一句「如斯面目塵埃甚 更說優曇別是春」,意思指有時人嘅雙眼被塵垢蒙蔽,若能看見曇花一現,人就應該抓緊機會,感受到春天嘅溫暖。呢首詩成就咗今年嘅新歌《面目》。Kendy 最喜歡《如斯》最後兩句歌詞「誰拼出的未來 你拼出的未來」,即使喺呢個混沌嘅時代,無人能夠預視未來會是如何,相信每個人還是可以活好自己,一齊活出那個未來。

Kendy 以太空人為《如斯》MV主角,給予觀眾很大的想像空間。(MV截圖)
Kendy 以太空人為《如斯》MV主角,給予觀眾很大的想像空間。(MV截圖)

至於今年另一首新歌《面目》則是《如斯》的第二集,歌曲講述喺呢個真真假假嘅年代,各人嘅不同面目同虛偽,兩首歌嘅MV 非常特別,Kendy 以太空人為MV 主角,走過銅鑼灣、中環等香港人每天營營役役會經過的地方,Kendy 希望大家能夠代入角色,以太空人嘅視角,用心感受每日都會經過嘅香港街道。另一樣啟發到Kendy嘅事係今年嘅疫情,香港人每日出街都會戴住口罩,Kendy 十分好奇喺口罩底下,大家嘅嘴臉係點嘅呢?社會中總有啲人會運用語言藝術,去美化自己所做嘅事,在如斯世代,更覺得大家要學懂如何面對呢啲面目,透過《面目》呢首歌去抒發呢啲思緒同情感,抒發過後,Kendy 表示接下來嘅新歌會以「放下」為主題。

《面目》MV (MV 截圖)
《面目》MV (MV 截圖)

問到未來的計劃,Kendy 心目中係有五首歌環繞住宋詞《出山相贊》,其實佢到而加都仲未決定到下一首歌係用邊一首,佢預計今年年尾可以推出,出年二月、四月時再推出之後兩首,佢預告每一首歌嘅曲風都會有所不同,Kendy 希望可以帶出不同面目嘅自己畀大家,不過每一個都係最真實嘅佢!至於大碟呢,佢話要計劃一下,始終做獨立歌手嘅路唔容易,目前見步行步。

英國讀書長大嘅Kendy寫得一手好書法,除了自己歌曲,更有為Eason、泳兒、林家謙等歌手設計歌曲封面。
英國讀書長大嘅Kendy寫得一手好書法,除了自己歌曲,更有為Eason、泳兒、林家謙等歌手設計歌曲封面。

Kendy 呢排亦忙於排演音樂劇《小塵大事2.0》,Kendy與組合小塵埃合作,主題講述人生中嘅大小事,如何面對失落、傷心等等事情,再重新獲得力量?想知道更多的話可以買飛入場支持,Kendy 感激導演邀請參演,佢話仲有好多方面需要學習,充滿挑戰。佢提到唔少舞台劇演員受到疫情影響演出,今次嘅演出係唔少演員今年第一次嘅舞台演出,大家都非常期待呢!

嚟緊Kendy 希望繼續自我power up,繼續前行, 最希望可以出演更多live performance,將佢嘅音樂帶畀大家!

睇更多YAHOO LUNCH K BACKSTAGE內容:

【Yahoo Lunch K】《全民造星III》李昭南:參賽是趟血淚交織的旅程

【Yahoo Lunch K 】$200演出費?JL李冠傑:世上沒有免費音樂