2021年上半年搶眼藝人逐個數 除咗193同Edan 仲有...

·4 分鐘文章
上半年搶眼藝人
上半年搶眼藝人

今年唔經唔覺就過咗一半,當中有唔少藝人發展順利而人氣急升,深受觀眾及網民喜愛,好似有MIRROR成員呂爵安(Edan)及ERROR成員193等等,今日就同大家睇下邊幾位藝人喺上半年表現搶眼,成功上位,唔知大家又同唔同意呢?

193@ERROR
TVB同ViuTV電視大戰鬥得如火如荼,早前ERROR成員「三爺」193(郭嘉駿)接受傳媒訪問時,反擊曾志偉指ViuTV較偏門同係與J2台鬥:「做好自己就有人睇,收視得幾百部電視機,我哋不嬲都唔理…J2係​做咩?冇記錯係咪40幾歲仲話做《#後生仔傾吓偈》嗰個?」,而被網民封為「娛樂圈清泉」,人氣爆升,IG追蹤人數由少過10萬去到今日(30日)嘅38.7萬,超越MIRROR人氣王姜濤,連佢嘅金句「知我咩料啦」都成為網絡潮語。另外,由ERROR成員主持嘅《ERROR自肥企画》亦成網上熱話,播出時節目片段經常被網民喺網絡上洗版,將193人氣再推上高峰。

193@ERROR
193@ERROR

Dee@ERROR
ViuTV綜藝節目《ERROR自肥企画》由ERROR成員梁業(肥仔)、郭嘉駿(​193)、吳保錡和何啟華(Dee)擔任主持,阿Dee可以話係最多網民討論嘅主持,佢喺節目中冇底線演出獲得網民讚賞,例如使出絕招「鳳凰不死鳥」時遭整蠱跌落陷阱、除褲拆薯片、被「死亡恆星」射下體、底褲塞氣球玩爆破及贏得一噸啤酒,令佢人氣急升。

Dee@ERROR
Dee@ERROR

Edan@MIRROR
男團MIRROR成員呂爵安(Edan)係隊中嘅音樂才子,今個上半年成績非常亮眼,喺4月完成團體演唱會及於年初單飛推出嘅首支個人歌曲《E先生連環不幸事件》深受歡迎,喺YouTube嘅點擊人次已突破500萬。另外,大家亦經常喺電視節目見到佢,例如綜藝節目《考有Feel》、《調教你MIRROR》及熱播BL劇集《大叔的愛》等等,佢憑住搞笑、冇「偶包」及貼地形象深得網民喜愛,更被網民笑指係「被外貌耽誤的諧星」。

Edan@MIRROR
Edan@MIRROR

黃德斌
萬眾期待嘅港版《大叔的愛》喺前晚(28日)終於播出,第一個跑出嘅就係形象又man又cool嘅黃德斌,佢喺劇中有破格演出,飾演上司翟國強KK雖然有一個結婚20年嘅老婆Francesca(簡慕華飾),不過佢竟然中途轉基,鍾意咗下屬阿田(Edan飾)。佢喺劇中演技收放自如,做出多個可愛及萌爆表情,驚喜度滿分,令人耳目一新,網民們更瘋狂截圖喺網上洗版。

黃德斌
黃德斌

陳自瑤
入行21年嘅陳自瑤(YoYo),喺今年初嘅《萬千星輝頒獎典禮2020》中YoYo疑似「黑面」回應老公嘅台上感言,令佢成為當晚嘅風雲人物,立即引起網民瘋狂討論。之後,佢喺《好聲好戲》嘅超班演出,獲得評判及觀眾認同,主席評判汪明荃更公開力撐YoYo做劇集女主角,之後佢即時成為搶手貨連拍兩套劇,其中嘅《選美的12夜》更升呢擔正做女一。

陳自瑤
陳自瑤

張天賦(MC)
《全星造星II》亞軍張天賦(MC),上年年尾宣布加盟華納唱片,至今已經先後推出兩首派台歌《Good Time》和《反對無效》,坊間反應不俗,絕對係今年最搶眼嘅樂壇新人之一。

張天賦(MC)
張天賦(MC)

炎明熹(Gigi)
16歲嘅炎明熹(Gigi)係無綫歌唱選秀節目《聲夢傳奇》冠軍大熱人選之一,每場比賽都有亮眼演出,獲得評判及網民讚賞,當中翻唱天后林憶蓮經典金曲《沒有你還是愛你》大獲好評,片段至今喺Youtube已經超過176萬點擊人次。

炎明熹
炎明熹

姚焯菲(Chantel)
除咗炎明熹之外,年僅14歲嘅姚焯菲亦同樣跑出,憑甜美歌聲演唱《戀愛預告》震撼全城,片段至今喺Youtube已經接近300萬點擊人次,更令佢被封為「國民初戀」。

姚焯菲
姚焯菲

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能