21克公寓｜廖啟智太太陳敏兒首談老公離世感受 手寫信記載內心話令智叔無悔人生

廖啟智太太陳敏兒孖二仔廖文信將擔任今晚（8日）最後一集ViuTV節目《21克公寓》嘉賓，亦係喺廖啟智胃癌離世後首次受訪剖白感受，陳敏兒嘅分享更一度令主持小儀和陳健安（On仔）憶起摯親去世而落淚。

小儀於節目指，陳敏兒接受訪問原因係希望鼓勵大家難過時要咬緊牙關面對。陳敏兒透露，廖啟智生前每日跑山、生活健康，當時得知對方患癌毫無心理準備，事關廖啟智本來因腸胃不適到醫院，卻被驗出胃癌：「點想像到3個禮拜前一個咁健康嘅人去跑蚺蛇尖，3個禮拜後就同我講佢得返1個月命？」陳敏兒指當時與兒子以手寫信記載內心對廖啟智嘅肯定：「我覺得總結佢人生嘅時候，人係好重要。如果能夠肯定佢嘅話，佢會覺得無悔。」

陳敏兒曾經喺廖啟智安息禮上表示廖啟智從無諗過咁快要離開呢個世界，最放唔低嘅就係兩個仔同自己，更憶述廖啟智生前嘅一番說話：「佢講：『敏兒，我冇諗過要丟低你，依家要留低你，辛苦你喇！』佢就係一個咁有責任感嘅人，佢唔係害怕死亡，佢只係唔捨得我哋，但我哋三個好想畀佢知道，我哋好掂，好會保護自己！」大仔廖文哲分享曾經在青少年時期與廖啟智關係較差，直至每次喺澳洲讀書返嚟，喺機場睇到廖啟智嘅笑容就知道佢係打從心底裡想見到自己；至於二仔廖文信現為YouTube頻道「小薯茄」幕後製作成員，佢曾喺其他訪問中透露，自己因爸爸影響先從事影片製作；亦分享廖啟智曾叮囑佢和哥哥一定要代為照顧媽媽，表示現已學會承擔責任。

陳敏兒更在廖啟智安息禮播出短片總結廖啟智一生，表示廖啟智各方面都好好：「作為一個演員，佢盡力滿足要求，作為一個爸爸，供書教學，陪伴孩子成長，佢曾經講過：『我好擔心你，我好唔放心你。』因為覺得自己未能完成丈夫責任，作為病人，佢係醫生口中A+病人。我作為妻子，『廖啟智，我以你為榮。』」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！