22年商台長壽節目《短期租約》11月完結 數吓今年電台界人事變動

現時社會環境之下，電台主持越來越難做，今年電台界就有唔少異動。商台叱咤903周末深夜音樂節目《短期租約》，喺剛過去周日晚嘅一集，主持Wasabi（鄺兆昌）正式宣布節目會喺11月28日正式完結。

Wasabi 1990年加入商台做廣告創作，並被委派做埋節目，1992年移居加拿大，喺當地電台工作。後來Wasabi回流，曾經做過唱片公司市場推廣，1999年重返商台。《短期租約》喺1999年5月啟播，本來一如節目名，只係Wasabi暫代主持其他周末節目，點知一做就做咗22年。

Wasabi 強調唔係受壓迫，年紀大同體力不再先係令佢考慮完結節目嘅原因。Wasabi本身係商業一台創作主管，另加星期日做主持，差唔多日日都要返工咁滯。至於會唔會再開咪，佢就不置可否，只係話「說了再見，真係可以再見嘅，但唔知幾時」。

同屬叱咤903嘅DJ Colin早前都宣布離開商台，並喺上周五完成最後一集節目《廣東爆谷》。

商台以外，港台都有唔少人事變動。3月，原民政事務局副秘書長李百全接替梁家榮出任廣播處長之後，掌管電台事務嘅助理廣播處長（電台及節目策劃）周國豐4月辭職，而馬浚偉就喺5月獲聘任為港台創作總監。6月中，二台節目《瘋SHOW快活人》主持曾志豪及貴花田被突然解僱，到6月底一台節目《自由風自由PHONE》主持區家麟亦被「叮走」。此外，二台《騷動音樂》主持閆擎3月22日在家中猝逝，終年30歲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！