3小美靚絕「聲夢幫」「少女G.E.M.」炎明熹寸爆無視對手

東方日報
·3 分鐘文章
炎明熹對自己的唱功信心十足。
炎明熹對自己的唱功信心十足。

受訓3個月的15名「聲夢幫」,吸收力驚人如「海綿寶寶」!獲歌唱老師大讚的「少女G.E.M.」炎明熹唱功了得,即被有過百場比賽經驗、「聲夢3小美」之一的詹天文視為假想敵,但她無視其他學員,揚言只視「自己對手」為對手!至於樣子甜美的「蜘蛛女」林沚羿,3歲便闖荷里活,有聲有樣有演技,隨時成為焦點!

無綫以全民投票方式舉辦的歌唱選秀節目《聲夢傳奇2021》,15名參賽者日前在電視城上堂學唱歌。雖然他們平均年齡只得17歲,但全都非常投入,坐定定上堂,不敢怠慢!其中「少女G.E.M.」炎明熹(GiGi)被點名大顯唱功,至於「3小美」鍾柔美(Yumi)、詹天文和姚焯菲被安排訓練感情演繹的竅門,年紀輕輕的她們唱歌感情恰到好處,獲導師讚不容小覷,表面天然呆,其實個個都是「海綿寶寶」,吸收力驚人而且表演力澎湃!

姚焯菲唔識阿嬌

Yumi、詹天文和姚焯菲在海選時已成為好朋友,覺得大家好啱Key,齊上齊落並未視對方為假想敵,Yumi坦言:「冇諗過去鬥,唔想有呢一日!我哋15個都係好朋友,唔想為咗爭獎,大家唔理大家!」有「小鍾嘉欣」之稱的Yumi,被問可覺得有優勢?她說:「10歲開始有人話我似,我都覺得似,但想大家認識我嘅歌多啲。」打從6歲學唱歌及跳舞的她坦言想入娛樂圈發展。

至於被指貌似鍾欣潼(阿嬌)的姚焯菲說:「贏唔重要,友誼先係最重要。(覺得自己似阿嬌?)我唔知佢係邊個,好多謝你哋讚我靚,但我希望觀眾唔好以貌取人,係聽我嘅歌!」至於有過百場比賽經驗的詹天文,有聲樂唱腔打底,音域超凡,她坦言視GiGi為假想敵。

怕阻人收工

大敵當前,15歲的GiGi自知比賽經驗不及詹天文,歌齡亦只得3年,但其唱歌技巧和感情演繹,被導師大讚成熟及穩定,問到可擔心被其他學員視為假想敵?她搞爛Gag,攤開雙手話對手係「自己對手」:「我只讀到中四,冇乜人生經驗,唱到嗰種感情,可能係我鍾意幻想。至於『對手』喺自己嗰度,哈哈!所以唔驚。(有冇壓力?)我諗壓力係怕耽誤工作人員收工時間。(覺得自己唱功似G.E.M.?)唔算,我仲搵緊自己嘅風挌!」

鍾柔美(左起)、姚焯菲與詹天文擺甫士扮花,嬌俏可人。
鍾柔美(左起)、姚焯菲與詹天文擺甫士扮花,嬌俏可人。
「聲夢3小美」被安排訓練感情演繹。
「聲夢3小美」被安排訓練感情演繹。
啤老師大讚15位「聲夢」學員個個醒目,吸收能力驚人。
啤老師大讚15位「聲夢」學員個個醒目,吸收能力驚人。



【相關搜尋】聲夢傳奇參賽者大起底