33年前新秀歌唱大賽入圍者 黎明輸俾邊個? 有人做咗法官!

 

上世紀八十年代,香港娛樂圈人才濟濟,新人入行都要有返咁上下實力至得。曾經係樂壇搖籃嘅新秀歌唱大賽,就係令梅艷芳、鄭秀文、陳奕迅等天王天后入行嘅重要基石。   有網友搵到一張1986年第5屆新秀入圍30強名單嘅報紙廣告,望一望,嘩!真係搵到唔少熟口面嘅名字。

先數下當年嘅三甲,金獎嘅文佩玲(12號)簽過TVB附屬嘅華星唱片,但係星運一般,錄好嘅專輯無法推出後離開華星,轉會後出過2張唱片但反應麻麻,九十年代轉行做保險,近年上過《流行經典50年》表演。   銀獎係唱《霧之戀》嘅許志安(23號),佢當年預科未畢業就參加比賽,結果拎到亞軍。同其他新秀一樣,浸咗一輪先有份出碟,但係有梅姐賞識,合唱《將冰山劈開》令佢先聲奪人。之後嘅經歷同hit歌大家都有印象,但係最為人熟悉嘅一定係嗰條片……   呢期因為Juno嘅《忘記和記》而被記起嘅黎明(17號),都係嗰屆新秀,拎到第三名。我記得佢係唱蔡楓華《絕對空虛》參賽架!   歷來新秀三甲之外都有唔少遺珠入咗行,第5屆入圍者之中,最為人熟悉嘅應該係關淑怡。其他入過娛樂圈嘅仲有︰袁鳳瑛(《天若有情》原唱)黃翊(出過7張唱片,因為戀情曝光被雪藏,轉行賣衫同開大排檔,因為上過《流行經典50年》而為人重新認識)劉錫明(新秀之後歌視兩線發展,之後被倪震旗下雜誌唱衰為「毒瘤明」轉往台灣及內地發展)林俊賢(先以藝員身份拍劇彈起,之後有唱過歌,同周星馳拍過《一本漫畫走天涯》。)袁志偉(唔係新聞部嗰位,出過2張碟之後轉行做風水師,又係上過《流行經典50年》)陳家碧(主持過《娛樂新聞眼》)吳啟明(吳啟華親阿哥,代表作應該係《大時代》丁家四兄弟)尹麗玉(新秀之後轉投亞視,拍過搞笑節目)方曉虹(第二年再參加新秀結果拎到冠軍,錄過歌不過無出過碟,前夫係李子雄)   有眼利網友就發問,27號嘅游德康,係咪現任區域法院法官。有人回應話「行內人證實係」,但又冇咩實則證明。不過根據政府簡介,游官生於1967年,嗰屆新秀時19歲,後生仔參加新秀都唔出奇。而且睇返游官而家張相又真係幾似。

游官去年初審過一宗新手爸爸掌摑初生女嬰導致BB變成植物人案件,傳媒報道提到,游官聽到案情提及女嬰狀況時,一度哽咽要求退庭。而近期佢就擔任前高官馮永業涉嫌收受利益案。   估唔到新秀嘅「畢業生」,勁到連法官都有!