34歲李慧詩笑指下年冇得參選港姐 無綫改圖抽水惹網民不滿

《奧運多面睇》截圖
《奧運多面睇》截圖

「牛下女車神」李慧詩(Sarah)喺東京奧運最後一日(8日)於場地單車爭先賽勇奪銅牌,香港代表隊最終奪得1金2銀3銅,創下港隊歷屆奧運嘅最佳成績。賽後李慧詩接受傳媒訪問,期間被問到已經34歲未來仲會唔會馳騁奧運賽場時,佢就幽默回應話:「我其實冇諗到嗰個歲數,我發現原來電視機直播成日都會講,但係我又唔係選港姐,選港姐好似到35歲都得㗎嘛?係囉,我仲有一年,去唔到,我下年冇得選港姐。」

之後,TVB娛樂新聞台喺Facebook專頁恭喜李慧詩獲得獎牌,向各項目嘅運動員、其教練、支援人員及家人致謝,最後仲話好高興知道Sarah有意參選下屆港姐,所以佢哋就為佢改動其中一項條件。同時佢哋上載咗一張參選港姐條件嘅截圖,將年齡限制就「未滿28歲」改為「34+N歲」,兼特別強調「TVB有絕對權決定豁免及/或放寬上述任何條件。」

呢個PO一出,有網民覺得好幽默搞笑,不過亦有網民鬧爆佢哋抽水,紛紛留言話:「好易抽水抽着火水。」、「乜X嘢公關啊,你真係好X核突」、「唔好拎李慧詩小姐做宣傳啦...慳d啦cctvb! 運動員又關娛樂新聞事?醒未呀小編?」、「當咁多香港人都咁尊敬香港運動員既時候 ,仲可以OnX當有趣 ,唔怪得貴台呢期咁高收視」、「大佬呀,你唔好咁痴線啦!」及「其實點解TVB搞到咁乞人憎,真係有得解 人哋訪問中嘅意思明明係「佢34歲之齡參加單車比賽係無問題 (=憑實力嘅比賽),比喻自己又唔係參選港姐 (=賣弄年齡嘅比賽)」,但就唔知點解被TVB旁述/FB扭曲理解為「佢好想參選港姐」究竟係刻意閱讀理解低定真係閱讀理解低?呢家仲懶風趣咁出個抽水post嚟顯示自己扭曲人哋意思?不知所謂!」等等。

《奧運多面睇》截圖
《奧運多面睇》截圖
TVB 娛樂新聞台Facebook
TVB 娛樂新聞台Facebook
TVB 娛樂新聞台 Facebook
TVB 娛樂新聞台 Facebook
《奧運多面睇》截圖
《奧運多面睇》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!