38歲男住公屋開空殼公司 涉洗3.7億黑錢被捕

海關宣布,琴日拘捕一名38歲報稱散工工人嘅男子,涉嫌喺2019年11月至2022年5月期間,開設15個銀行戶口,處理高達3.7億元可疑資金,目前已凍結其戶口700萬元存款。 被捕人居住喺大圍隆亨邨,分別喺7間銀行開15個戶口,又喺2020年成立空殼公司,訛稱經營家私及清潔用品生意,但其公司無實際地址及報稅記錄。 被捕人曾喺一年間收取2.9億元,處理超過500宗交易,海關正循資金來源及流向繼續調查。