4年前用網名「深井小燈籠」玩你點我唱 連登絲打泳兒再獻聲

唔少藝人都會留意討論區網友點睇自己，甚至會開account玩埋一份。剛剛喺叱咤頒獎禮上，獲得入行17年來首個叱咤樂壇女歌手銀獎嘅泳兒，原來係一位連登絲打！

話說泳兒得獎後，有網民搵返4年前一個post，樓主係網名「深井小燈籠」嘅女user，同大家玩「你點我唱」。當時反應唔錯，「深井小燈籠」亦有求必應，唱咗好幾首歌。泳兒出名唱功好聲靚，扮素人話咁快有人認得，但居然亦有人唔認得泳兒把聲，仲讚佢似謝安琪！

4年後嘅今日，個post再次浮上水面，而「深井小燈籠」亦開咗個2.0版本帳戶，再同網民玩「你點我唱」。今次佢唱咗呢期好hit嘅First Love、叱咤得獎歌《到底發生過什麼事》、《小心地滑》同埋生力軍金獎Jeremy（李駿傑）嘅《半》。識做嘅網民亦有叫「深井小燈籠2.0」唱泳兒嘅《黛玉笑了》、《葉落冰川》等。

到底「深井小燈籠」係咪泳兒？有傳媒向泳兒求證，佢冇直接回應，只係話因為「佢」而喺社交平台識到好多新朋友，最緊要大家聽得開心。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！