「40億千金」被嘲窮? 蔡頌思$120捱一星期

東方日報
·2 分鐘文章
曾羞於公開家境的蔡頌思,現已大方面對「40億千金」稱號。
曾羞於公開家境的蔡頌思,現已大方面對「40億千金」稱號。

早前退選港姐的「40億千金」蔡頌思,因有機會與袁詠儀拍戲而被質疑靠關係,幸蘇玉華的一席話令她開竅,接受自己的背景。小時候家教嚴的她,一星期只有120元零用錢,被朋友取笑是「最窮嘅有錢人」。

已故「海產大王」蔡繼有孫女蔡頌思(Jocelyn),因舞台劇及「網絡大電影」拍攝工作跟港姐合約有牴觸,早前在大熱姿態下退選。花了兩個月為參賽作準備的她大感可惜,望明年捲土重來。

Jocelyn小時候性格怕醜,被媽咪強迫參加戲劇班,意外發掘她對舞台的興趣,亦令她變得開朗及主動,大學畢業後更放膽追夢,做全職演員。星運不俗的她,先後在舞台劇及電影跟蘇玉華、袁詠儀合作,卻因家庭背景而被質疑靠關係得到角色,令她情緒崩潰:「有日蘇玉華見我偷偷喊就安慰我,佢話張達明導演揀得你,一定有佢嘅原因,你就係你,唔可以滿足到每一個人。呢番說話啟發我好多,以前我會收收埋埋,唔想畀人知我背景,但依家學懂接受。」一度羞於被人知道身份的她,現已對「40億千金」綽號坦然接受:「都幾好,令人易啲記得我,依家朋友都叫我『千金』。」

慣咗冇人服侍

出身名門的Jocelyn自小家教嚴格,求學時家中禁睇電視、禁玩遊戲機、禁跟朋友出街、禁零食與有味飲料,而且零用錢不多,她不得不省吃儉用:「一星期包埋交通費只有120蚊零用錢,出入都係搭巴士、地鐵,朋友話我係『最窮嘅有錢人』!好多人都睇唔出我咁有錢,以為彼此家境差唔多。我全家人都好慳,咁都幾好,訓練到我拍戲就算冇人服侍、食飯冇得揀都冇問題。」

感情方面,媽咪自小向Jocelyn灌輸「出來工作才可談戀愛」的觀念,但她考畢A-level已初戀,問會否擔心男方因其背景而追求她?她說:「中學大家都好純粹,唔會睇背景,而且我細個零用錢咁少,冇人覺得我有錢。」現時單身的她,擇偶條件首要愛錫她、有上進心及笑容好看。

蔡頌思獲選與影后袁詠儀合作,惹來「靠關係」的閒言閒語。
蔡頌思獲選與影后袁詠儀合作,惹來「靠關係」的閒言閒語。