41歲吳卓羲因「不老」外貌登微博熱搜 昔日TVB小生誰顏值崩壞？

41歲吳卓羲（Ron）近日因為一張《飛虎之雷霆極戰》舊宣傳照成為微博熱搜話題，網民大讚吳卓羲保養得宜，仍能保留昔日清秀俊朗嘅小生形象，亦多咗一份男人味，有網民更指吳卓羲完全無老過，直言：「男神越來越有成熟儒雅的味道」、「行走的荷爾蒙」、「真不敢相信這是41歲的狀態！」等等。

吳卓羲2000年加入TVB隨即受到力捧，拍攝過《大唐雙龍傳》、《衝上雲霄》、《少年四大名捕》、《學警》系列等經典劇集，當年與林峯、黃宗澤、陳鍵鋒叱咤一時，被譽為TVB四大小生，不過現時4人各有發展，久未喺港劇露面。年過40歲嘅佢哋未知仍能保持當年型男外型定係已經顏值崩壞？一齊嚟睇睇！

【41歲林峯】
林峯1999年出道，演出過《尋秦記》、《溏心風暴》及《使徒行者》等多套經典劇集，多次與視帝擦身而過，2014年離開TVB，而近日則加盟華納唱片，成為「華納一哥」。林峯多次傳出整容，如眼皮變深、鼻樑變挺、臉型變尖等，同出道嗰陣黝黑眼細模樣大爲不同，近年就有唔少網民覺得林峯臉部表情開始變得僵硬唔自然。

【40歲黃宗澤】
黃宗澤2017年約滿TVB離巢，轉到邵氏兄弟主力喺內地發展。黃宗澤一向因俊俏外型迷倒唔少女生，有網民更指黃宗澤喺2012年播出劇集《護花危情》中嘅樣貌係佢嘅全盛時期。直至2016年，Bosco明顯有眼紋出現又眼窩有凹陷趨勢，倦態盡現。

【43歲陳鍵鋒】
陳鍵鋒當年因爲溫文書生、「小鮮肉」面貌俘虜唔少少女心，近年主要喺內地發展嘅佢2010年更因內地古裝劇《美人心計》而被封為「史上最帥皇帝」。雖然陳鍵鋒外貌仍然帥氣，留有鬍子增添男人味，但唔少網民都認為佢踏入中年後，身形比以前發福，文弱書生形象不再。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！