43歲袁偉豪曾任人體寫真模特兒 大爆TVB出鏡率大減箇中原因
現年43歲嘅袁偉豪（Benjamin），當年以大熱姿態成為港男冠軍，佢喺加入TVB後佢拍過好多唔同嘅電視劇集，一步一步成為當家小生之一，2018年更憑《棟仁的時光》成雙料視帝，不過近年佢喺TVB嘅出鏡率大減，早前佢作客資深電視劇製作人楊紹鴻嘅YouTube節目《小鴻吹水站3》專訪，期間仲講到箇中原因。
袁偉豪日前接受資深電視劇製作人楊紹鴻YouTube節目《小鴻吹水站3》專訪，節目一開頭楊紹鴻就直指袁偉豪細個係校草，並問佢係唔係自小立志加入娛樂圈，袁偉豪覺得加入娛樂圈係一個緣份，因為當年佢參加《YES!》校花校草選舉，佢嗰時重讀中三，喺溫書時睇呢本雜誌並留意到校花校草選舉嘅冠軍得主可以有5千蚊獎金及1萬蚊服裝禮券，而提名人都有2或3千蚊現金獎，喺獎金吸引及想玩嘅情況下參加，最終成功獲得冠軍。袁偉豪獲得校草冠軍後，由於佢有親戚喺唱片公司返工，所以就邀請佢簽經理人公司入行，成為黎瑞恩嘅小師弟。之後，佢開始接拍廣告及拍電影。
之後，袁偉豪被問到有咩驅使去拍攝大尺度人體寫真，佢就話當時大概25歲，已經入咗行7至8年，電影發展上機會唔多，所以佢開始擔任幕後工作及搵兼職工作，佢喺網上見到有人徵模特兒，原來係一班畫家搵人擔任人體素描模特兒，而且仲有機會要全裸。佢仲話有少少卻步，不過當時同佢拍拖嘅朋友仔性格比較洋化，鼓勵佢去嘗試，之後令佢覺得係要做啲嘢，令自己嘅人生多個經驗，所以佢就膽粗粗去咗做一次嘅人體素描模特兒。被問到有冇尷尬時，佢就話一定有呢個過程，不過當時有7至8個artists，佢一入去就話開始，之後佢就放低背囊同喺佢哋面前除杉，雖然當時好尷尬，不過已經返唔到轉頭，拎啲咕𠱸遮住重要部位。過咗5分鐘之後，佢覺得自己對artists唔尊重，因為對方會感受到佢唔放鬆，所以佢就放開啲，俾佢哋隨便畫。
佢參加2007年度嘅TVB香港先生選舉，並以大熱姿態獲得冠軍，當選一星期後佢就前往湖南長沙參加真人騷《舞動奇跡》，之後佢默默耕耘終上位，成為當家小生之一。不過近年佢喺TVB出鏡率大減，佢坦言話公司安排，無辦法，佢條命係咁。之後佢再話公司有公司嘅安排，一朝天子一朝臣，以前嘅佢好多嘢做同好拼搏，去到公司想佢去另一個位置，佢亦會跟住做。不過當公司轉高層轉格局，就冇咗嗰班搵佢做嘢嘅人，又要去重新建立。再加上呢5至6年佢好少喺電視出現，原因係公司開始有同內地合拍劇，一年開一至兩套，或者兩年先拍一套，所以觀眾就會少咗見到佢。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
