47歲杜如風《解風東京》承認9年冇拖拍 最新擇偶條件：眼耳口鼻齊全

杜如風主持嘅J2台旅遊節目《解風東京》正熱播，一連15集與觀眾暢遊東京介紹至潮景點。日前，杜如風與糖妹（黃山怡）擔任由郭偉亮（Eric Kwok）、劉浩龍、陳欣茵和陳若思主持嘅J2節目《鋪鋪 Poker》嘉賓，與相識逾20年嘅郭偉亮及劉浩龍對答甚有火花。

郭偉亮喺節目一開始就以「倫仔」稱呼杜如風，大爆佢15年前無責任感、淨係顧住玩、從來唔守時：「約佢今日可能第二日先到，好離譜」；不過，現時嘅杜如風已經改變。杜如風解釋自己已經幾年無遲到：「係喺我開始冇乜嘢做嘅時候，覺得自己係咪應該做返好啲個人呢，而家我有早到㗎。」又分享指，「倫仔」係佢花名，原因係佢英文名叫 Helen，即係海倫個倫，所以就有呢個名出現，同時表示自己今次減咗 20 磅去拍攝。《解風東京》已播出第6集，網民對於節目有讚有彈，部分觀眾大讚節目好睇：「其實幾好睇，唔似其他係咁一味搵平野去打卡tourism，佢係真係好chill咁travel」、「好中意睇佢洗錢」、「佢講嘢把聲同個節奏幾好笑」、「肥左好多，但杜如風做日本旅遊節目真心好好睇」等等。不過，都有網民表示杜如風全盛時期已過，2007年嘅《流行東京》好睇好多：「以前睇佢喺now做風行全世界好好笑，依家老態又殘」、「佢講嘢衰到都唔知係懶音定係黐脷筋」、「完全唔明點解仲會搵佢拍」、「已經過氣」、「以前流行東京其實拍得幾好，拍嘅風格有feel好多」等等。

杜如風於節目表示自己已9年無拍拖，又無人追：「我想講做咗十幾年旅遊節目，拍攝期間從來都冇艷遇嘅，你話死唔死，喺香港已經冇，但無論去到世界邊一個地方，都係冇艷遇嘅，呢件事從來都好沮喪，不過算啦靠自己。」對於擇偶條件，杜如風笑指宜家要求已經唔高，眼耳口鼻齊全就可以。糖妹又於《鋪鋪 Poker》問及杜如風，如果將來結婚，會否有生小朋友打算，郭偉亮替佢搶答「我諗做佢（杜如風）嘅小朋友都唔想出世。」而杜如風就表示：「都幾大鑊㗎」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！