5大抹茶甜品推介！巴斯克芝士蛋糕、生酮忌廉卷

講到甜品嘅口味，一定唔可以冇抹茶，每次提起都不期然令各位甜品控心心眼。而且抹茶甜品嘅款式真係多到數都數唔晒，今次介紹幾款唔同嘅抹茶甜品畀大家，抹茶控，自行bookmark啦！

抹茶士多啤梨麻糬巴斯克芝士蛋糕  Soulgood Bakery

如果你同時係抹茶控同煙韌控，一定唔可以錯過呢間以流心巴斯克蛋糕聞名嘅甜品店。佢哋嘅抹茶士多啤梨麻糬巴斯克芝士蛋糕選用京都其中一個最高級的茶坊「丸久小山園」出品嘅抹茶粉，茶味香濃帶微微苦澀，甜度適中，又可以突顯芝士蛋糕嘅芝士香。軟熟creamy嘅蛋糕加埋煙煙韌韌嘅麻糬，口感好豐富呀。

限定柚子抹茶梳乎厘班戟  TERA

甜品控唔好錯過呢間由法國藍帶廚師主理嘅甜品店，除咗抹茶外仲有好多款式嘅甜品，不過抹茶控嚟到都唔使諗喇，見到每日限定嘅柚子抹茶梳乎厘班戟，揀佢就啱。採用靜岡抹茶製作，茶香味濃，搭配柚子醬又帶有清新感覺，梳乎厘班戟口感鬆軟，力推。

生酮宇治抹茶忌廉卷 Espresso Alchemy

減肥人士都啱食嘅甜品！呢個生酮抹茶忌廉卷同平日食開嘅分別唔太大，首先抹茶蛋糕都做到幾軟熟，忌廉好綿滑，抹茶味好濃，完全冇好膩嘅感覺。面頭仲加左少少抹茶粉，食落香醇回甘，而且成個甜品都唔太甜呢。

抹茶紅豆班戟 Gram cafe & pancakes

來自日本嘅連鎖pancake店，所有食物做法完全跟足日本，食材9成都係由日本總店運過來，所以保證食得返家鄉味道。推介抹茶紅豆班戟，班戟中間夾住唔同嘅食材，最上層有士多啤梨同紅豆泥，同抹茶嘅味道都好夾，中間夾住啲cream，最底層係抹茶布甸，口感有層次，幾特別同幾有驚喜。

宇治抹茶芭菲 和氣食堂

一間性價比幾高嘅日本料理，佢嘅抹茶芭菲口碑都唔錯，因為真係好足料，材料由日本直送，宇治抹茶雪糕好幼滑，茶味好濃帶有淡淡奶香，好出色嘅抹茶雪糕！另外配料有煙韌嘅小丸子、厥餅、紅豆同粟米片，食完呢個甜品真係完美句號～

文: Yanica

編：Kar