5大日式居酒屋！海鮮櫃自選心水海鮮、厚切白鱔串燒

有咩開心得過同一班朋友，食住日式料理小酌一番？今期介紹5間特色日本居酒屋畀大家，間間都各有過人之處，如自設海鮮展示櫃、日本街景主題及藏身於小巷中嘅小店等。

自設海鮮展示櫃 和藏

鍾意海鮮嘅朋友一定唔可以錯過呢間新開嘅居酒屋，餐廳自設海鮮展示櫃，供應頂級海膽、魚鮮、炸物及串燒等。誠意推介龍蝦料理兩食，黃金醬燒以蛋黃碎、鹹蛋黃碎同龍蝦膏製成香濃醬汁嚟燒製龍蝦肉，鹹香惹味，另外龍蝦粥特別以龍蝦殼、昆布同清湯一同熬煮，滿滿鮮味。講到日本嘢又點少得和牛，宫崎A4和牛肉眼三食分別製成和牛炙壽司、和牛三文治同和牛壽喜燒，牛魔王一定滿足。酒單以日本地圖嚟區分各地嘅特色清酒，啱晒酒鬼呀。

厚切白鱔串燒 晴舍

裝修好似咖啡店咁嘅居酒屋，落地玻璃透光度足，喺度食飯零舍寫意。招牌菜秘製醬燒厚切白鱔，白鱔好厚肉，燒到外層脆卜卜，入口外脆內軟亦充滿魚油香，加埋秘製醬層次更豐富。秘製芥末醬燒十勝豚蔥串都係另一人氣之選，豚肉一層肥一層瘦，加埋芥末醬就無咁膩啦～另外日式芥末風味蝦球同安格斯牛薄燒都值得一試。

日本街景主題 黑木亭居酒屋

呢間居酒屋就以日本街景為主題，好有日本風味㗎。最近餐廳仲推出咗唔少新菜式，包括巨無霸蟹蓋飯、一口和牛三文治同日本啤酒拉麵等。巨無霸蟹蓋飯選用巨型麵包蟹，先將所有蟹膏配上少量蟹肉炒飯，充滿蟹膏鹹香，蟹腳及蟹鉗啖啖肉好鮮味。日本啤酒拉麵以啤酒杯盛載拉麵，實質就唔包含任何酒精，拉麵配上冷麵汁好清爽，最重要係啱晒相機食先。

主打串燒及炸串 申、居酒屋

天后主打串燒同炸串嘅居酒屋，以日式木系設計配搭大理石吧枱，簡約時尚，餐廳更請到潮人葛民輝親自設計Logo、餐具及杯墊添！串燒同炸串嘅款式不定時更換，如炸活蝦、炸墨魚嘴同炸蛋等，亦有供應套餐。想食豪啲要試下鹽釜燒鮑魚，選用南非活鮑魚，以豉油同昆布湯熬煮鮑魚幾個鐘，以昆布包裹鮑魚，最後加入蛋白鹽焗煮，彈牙又鮮味。文化燒牛脷以低溫55度烹調，配以牛油果蒜頭打成嘅蛋黃醬，再加入經牛油炒過嘅麵包糠，令到牛脷口感變得更鬆化，鍾意牛脷嘅朋友不可錯過！

小巷串燒小店 本格

位於中環小巷一間唔太起眼嘅串燒店，主打雞肉串燒，仲有主食、清酒及啤酒等供應，啱晒2-3位朋友去傾下偈。招牌雞肉串燒，選用新鮮三黃雞，老闆更特意花上5位數字由日本訂製最高可以高達2000度嘅燒爐返嚟製作，紫蘇葉雞腿多肉汁，帶淡淡紫蘇葉清香～燒雞皮都係必食㗎，燒至香脆，邪惡都要食呀。另外仲有鵝肝炒飯、鰻魚炒飯同明太子烏冬等主食，咁就點都有啲澱粉落肚。酒類方面除咗紅、白酒、清酒同啤酒等，仲有用清酒做基底製成嘅cocktails，好特別。

文: Yanica

編：Kar