5大精選沾麵店!和牛沾麵、特濃番茄湯底

拉麵同沾麵都各有fans,沾麵比起拉麵味道上更濃郁,啱晒重口味嘅朋友~而且一碗高質嘅沾麵,由麵質、湯底到溫度都唔可以馬虎,以下呢5間沾麵店都各有特色,有日本過江龍、超濃郁雞白湯同番茄湯同埋和牛沾麵,快啲睇下邊間啱你口味~

和牛沾麵 Mashi No Mashi

每個人去都必試嘅招牌特製沾麵,一碗入面有兩大塊尾崎和牛,和牛有稍微用火槍燒過,牛肉味香濃肉質嫩滑,啱晒食肉獸。麵條方面彈牙有嚼勁,而且好掛湯,湯底用和牛熬製而成,一樣咁重牛味,好夠熱,入面仲有啲牛肉同大蔥粒,好足料。不過有唔少食客都反映湯底有啲鹹,可能重口味嘅朋友會啱啲,不過店舖都可以加水配合返個人口味。

圖: wtf._.99on
圖: wtf._.99on

超濃郁雞白湯 座銀

呢間人氣麵店,menu選擇貴精不貴多,去得嘅多數都係為佢哋嘅招牌雞白湯而去。雞白湯底係用原隻雞高溫長時間熬製,質地好creamy,呈奶白色,味道上有濃濃嘅雞香,表面仲有一層用湯底打起嘅泡沫,令湯底有軟綿綿嘅感覺。麵質較粗身,質感煙韌有蛋香。最貼心係碗有加熱過,食到尾時碗湯都唔會變凍呀~

圖: Kt.foodnote
圖: Kt.foodnote

過江龍鯛白湯底 ○de▽ 鯛白湯らーめん

通常食沾麵大多數見到嘅都係魚介湯底,呢間來自日本大阪嘅嘅拉麵店就主打鯛魚湯!奶白色嘅湯底係用咗日本新鮮鯛魚同貝殼類海鮮熬煮8小時而成,香濃又鮮甜,入面亦加咗洋蔥粒、叉燒粒同帶焦香嘅魚肉粒。麵質比較特別,扁平粗身有啲似刀削麵,掛湯度夠,上碟時以乾冰營造煙霧,啱晒相機食先。

圖: foodieleaf_hk
圖: foodieleaf_hk

清新番茄湯 麵屋福

主打三款招牌沾麵嘅小店,當中比較受歡迎嘅係番茄紅油沾麵,番茄味足,濃郁中帶淡淡酸味,仲有微辣感,醒胃又惹味。經典款魚介豚骨湯底都有驚喜,除咗醬油豚骨湯底香氣,仲有鰹魚粉香、蔥香、豬油香同芝麻香,好有層次。麵條粗身有咬口,掛湯力都唔錯~仲可以自行追加半熟蛋同肩胛肉叉燒等配料。

圖: candy110
圖: candy110

海蝦味噌沾麵 台風。R

鍾意海鮮嘅朋友,可以試試呢個海蝦味噌沾麵~湯底好濃郁又唔會太鹹,充滿蝦嘅鮮味,仲加咗櫻花蝦鮮上加鮮。沾麵配有半熟蛋、荀乾、檸檬角,建議可以唧幾滴檸檬角落麵汁,味道會無咁易膩。豚肉用慢煮方法煮成,保留咗肉汁又夠嫩。另外一提呢度嘅麵就算揀普通份量都已經幾多,啱晒大食嘅朋友。

圖: Oh My Food Bae
圖: Oh My Food Bae

文: Yanica

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能